Авганистан: Во бомбашки напад во Кабул убиени три лица

КАБУЛ

Најмалку три лица се убиени во бомбашкиот напад што рано утрово се случи во главниот град на Авганистан, Кабул, јавува Агенција Анадолија (АА).

Од Министерството за внатрешни работи на Авганистан е соопштено дека нападот е изведен со активирање бомба што била поставена на возилото на гласноговорникот на Дирекцијата за јавна заштита, Зија Вадан.

Во нападот е убиен Вадан и неговите двајца сопатници, а уште едно лице е рането.

Никој не презеде одговорност за нападот, а од полицијата за нападот ги обвинија талибанските милитанти.

Авганистан е упориште на повеќедецениска политичка и безбедносна криза поради борбата за превласт помеѓу талибанското движење и владините сили.

Постојана безбедносна закана претставува и терористичката организација ДЕАШ, која по поразот во Ирак и Сирија, значително ги интензивираше активностите на тлото на Авганистан.

Нападите во Авганистан не престануваат ниту по почетокот на мировните преговори, што делегациите на талибанските бунтовници и авганистанската Влада ги почнаа кон средината на септември минатата година во катарска Доха.