Американската актерка Хајден Панетиер почина на 36-годишна возраст

Американската актерка Хајден Панетиер почина на 36-годишна возраст, потврди нејзиниот претставник за Еј-би-си њуз доцна синоќа, јавува Анадолу.

„Со длабока тага ја споделуваме веста за трагичната смрт на нашата сакана Хајден. Таа беше неверојатна светлина и природна сила што им носеше неизмерна љубов и радост на сите што ја познаваа – и на милионите што ја гледаа на екраните“, наведе нејзиниот татко Скип Панетиер во соопштение.

Тој побара приватност додека семејството тагува.

Засега нема достапни информации за околностите во кои починала.

Панетиер почна да глуми како дете и имаше долга кариера на телевизија и во филмови.

Беше позната по улогата на Клер Бенет во суперхеројската серија „Херои“ на Ен-би-си и на Жулиет Барнс во драмската серија „Нашвил“.

Меѓу нејзините најзначајни филмски улоги се во филмовите: „Сеќавање на титаните“, „Животот со Хелен“, „Принцеза на мразот“ и „Врисок 4“.

Таа јавно зборуваше и за тешкотиите со кои се соочувала поради славата уште од детството, па сè до зрелоста. Во мај ја објави книгата со мемоари „Ова сум јас: Соочување со вистината“.

Нејзиниот брат Џенсен Панетиер ненадејно почина во февруари 2023 година на 28-годишна возраст.

Тогаш семејството соопшти дека неговата смрт била предизвикана од зголемено срце, заедно со компликации поврзани со аортната валвула.