Американскиот Претставнички дом одобри помош за Украина, Израел и Тајван

ВАШИНГТОН (АА) - Претставничкиот дом на Конгресот на САД вчера го усвои пакетот помош во вредност од 95 милијарди долари за Украина, Израел и другите сојузници на Соединетите Американски Држави (САД), пренесува Анадолу.

Претседателот на Претставничкиот дом, Мајк Џонсон, го претстави планот за гласање на четири одделни нацрт-закони за странска помош за подоцна да се соединат во пакет, што предизвика негодување кај некои крајно десничарски републиканци во парламентот.

Покрај помошта за Украина, Израел и Тајван, четвртиот предлог-закон вклучува и други приоритети за национална безбедност, вклучително и можна забрана на ТикТок, одредба за помош во плаќањето на помошта со користење на запленети руски средства, како и санкции и други мерки за спротивставување на Русија, Кина и Иран.

Претставничкиот дом гласаше за нацрт-законот за ефективно забрана на ТикТок во САД, освен ако не го купи американска компанија. За предлогот гласаа 360 пратеници, а 58 беа против.

Со големо мнозинство Претставничкиот дом го усвои нацрт-закон за обезбедување помош на Тајван и неговите индо-пацифички сојузници, со 385 гласа „за“ и 34 „против“.

Домот усвои и закон за помош на Украина во износ од 60,8 милијарди долари.

По усвојувањето на овој закон, демократите вееја украински знамиња и скандираа „Украина, Украина“.

Претставничкиот дом одобри и 26 милијарди долари помош за Израел со 366 гласови „за“ и 58 „против“.

Сенатот се очекува да го изгласа пакетот следната недела, по што ќе го одобри претседателот Џо Бајден.

„Го повикувам Сенатот брзо да го испрати овој пакет на мојата маса за да можам да го потпишам и ние брзо да испратиме оружје и опрема во Украина за да ги задоволиме нивните итни потреби на бојното поле“, рече Бајден.