Зеленски: Разговарав со Блинкен и Остин за американската одбрана и финансиската помош за Украина

КИЕВ (АА) - Претседателот на Украина, Владимир Зеленски, изјави дека со шефовите на дипломатијата и одбраната на Соединетите Американски Држави (САД), Ентони Блинкен и Лојд Остин, разговарал за помошта од САД за Украина и за воведувањето дополнителни санкции кон Русија, јавува Агенција Анадолија (АА).

Министерот за надворешни работи Блинкен и министерот за одбрана Остин синоќа преку Полска пристигнаа во Киев, каде беа примени од претседателот на Украина, Зеленски.

Состанокот се одржа зад затворени врати, а Зеленски на својот профил на Телеграм рече дека тоа е важна и вредна посета во клучни моменти за Украина.

Зеленски им се заблагодари на американските власти за нивната поддршка на Украина соочена со руски напади.

„Разговарав со Блинкен и Остин за одбранбената помош, финансиската поддршка и безбедносните гаранции за Украина и за зајакнувањето на санкциите против Русија“, рече Зеленски.