Израелската армија започна „опсежна копнена операција“ во Газа

ИСТАНБУЛ (АА) – Израелската армија започна „опсежна копнена операција“ во воено разорениот Појас Газа, соопшти денес војската, пренесува Анадолу.

„Во текот на изминатиот ден, (армиските) трупи на ИДФ од Јужната команда, и постојаната војска и резервниот состав, започнаа опсежна копнена операција низ целиот северен и јужен дел на Појасот Газа, како дел од почетокот на операцијата „Кочиите на Гидеон“, се вели во соопштението на војската.

Портпаролот на војската, Авичај Адраи, рече дека војската ги интензивирала нападите во Газа во изминатите денови, погодувајќи повеќе од 670 позиции на Хамас „за да ги попречи подготовките на непријателот и да помогне во копнената операција“.

Израелската армија ги интензивираше воздушните напади врз Газа во последните пет дена, што коинцидираше со турнејата на американскиот претседател Доналд Трамп низ Персискиот Залив, во рамките на која ги посети Саудиска Арабија, Катар и Обединетите Арапски Емирати.

Израелската армија спроведува брутална офанзива во Газа од октомври 2023 година, во којашто се убиени над 53.300 Палестинци, повеќето од нив жени и деца.

Меѓународниот кривичен суд во ноември издаде налози за апсење за израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со тужба за геноцид пред Меѓународниот суд на правдата за својата војна во енклавата.