Израелската армија изврши напади на 250 цели во Газа во текот на изминатиот ден

ЕРУСАЛИМ/КУДС (АА) - Израелската армија денес соопшти дека погодила околу 250 цели низ Појасот Газа во изминатите 24 часа, пренесува Анадолу.

„Армиските трупи продолжуваат да лоцираат оружје, подземни шахти, експлозиви и дополнителна воена инфраструктура“, се вели во военото соопштение.

Армијата соопшти дека против палестинските борци во Појасот Газа се водат „интензивни борби заедно со воздушна поддршка“.

Палестинската група Хамас вчера соопшти дека убила 10 израелски војници на „празен дострел“ во источниот дел на Хан Јунис.

Групата соопшти дека нејзините борци, исто така, во градот погодиле три израелски тенка, два транспортера и три воени булдожери со противоклопни гранати.

Израел ја продолжи својата воена офанзива на палестинската територија во петокот по завршувањето на еднонеделната хуманитарна пауза со палестинската група Хамас.

Најмалку 16.248 Палестинци се убиени, а повеќе од 43.616 други се повредени во немилосрдните воздушни и копнени напади врз енклавата од 7 октомври по прекуграничниот напад на Хамас.

Според официјални податоци, билансот на загинати Израелци во нападот на Хамас изнесува 1.200.