Израелската армија: Иран го нападна Израел со 290 проектили и дронови

КУДС/ЕРУСАЛИМ (АА) - Израелската армија денес соопшти дека Иран го нападнал Израел со 290 проектили и дронови, вклучително и со 100 балистички проектили, пренесува Анадолу.

Израелската јавна радиодифузна корпорација ја цитираше Армијата дека синоќа Израел бил подложен на ирански напади со околу 100 балистички ракети, 30 крстаречки ракети и 160 самоубиствени дронови.

Ракетите и лансирањето на дроновите е извршено од различни локации во Иран во неколку бранови, се вели во соопштението.

Армијата истакна дека тоа се совпаѓа со други лансирања на проектили и дронови од Јемен и Ирак, и околу 40 од Либан.

Армијата објави дека израелските воени авиони заедно со други земји предводени од Соединетите Американски Држави „пресретнале повеќе од 20 крстосувачки ракети“ надвор од територијата на Израел.

„Немаше пенетрација на крстаречки ракети на израелска територија, туку балистички ракети што предизвикаа мала штета на инфраструктурата“, соопшти Армијата без да наведе детали.

Иран вчера започна воздушен напад против Израел како одмазда за воздушниот напад на 1 април врз иранскиот дипломатски објект во сириската престолнина Дамаск. Во нападот загинаа најмалку седум припадници на Корпусот на иранската Исламска револуционерна гарда, меѓу кои двајца високи генерали.

Техеран го обвини Израел дека го извршил нападот и вети дека ќе одговори. Тел Авив официјално не ја презеде одговорноста за нападот, но со месеци наназад изврши повеќе напади врз ирански цели низ Сирија.

Иран и Хезболах, неговиот главен сојузник во Либан, рекоа дека нападот нема да помине неказнето.