Израелската војска ја запали палестинската страна на преминот Рафа

ГАЗА (АА) - Израелската Армија денес ја уништи и запали салата за поаѓање на палестинската страна на преминот Рафа, на крајот исклучувајќи ги Палестинците во Појасот Газа од надворешниот свет, јавува Анадолу.

Откако ја презеде контролата врз преминот Рафа пред 40 дена, израелската Армија ја запали салата за заминување, како и други објекти и згради, со што на крајот беше уништена излезната точка за Палестинците од Газа во надворешниот свет.

Неколку палестински профили на социјалните мрежи споделија слики од целосно изгорената сала.

Ова доаѓа во време на тековните упади на израелските воени возила во областа на коридорот Филаделфија во Рафа, демилитаризирана тампон-зона што се протега покрај границата на Појасот Газа со Египет.

На 6 мај, израелската Армија го нападна Рафа, мал град на јужниот крај на Појасот Газа, и покрај меѓународните предупредувања.

Израел се соочи со меѓународна осуда поради неговата континуирана брутална офанзива врз Газа по нападот на Хамас на 7 октомври 2023 година и покрај резолуцијата на Советот за безбедност на ОН со која се бара итен прекин на огнот.

Оттогаш, повеќе од 37.300 Палестинци се убиени во Газа, повеќето жени и деца, а повеќе од 85.000 се повредени, според локалните здравствени власти.

По осум месеци од почетокот на израелската војна, огромен дел од Газа е во урнатини, a владее и блокада на храна, чиста вода и лекови.

Израел е обвинет за геноцид пред Меѓународниот суд на правдата (МСП), кој во својата најнова одлука му нареди на Тел Авив веднаш да ја прекине операцијата во Рафа, град во јужниот дел на Појасот Газа, каде што повеќе од милион раселени Палестинци побараа засолниште.