Израелските сили започнаа нов упад во сириска Кунејтра

Израелските сили утрово извршија нов упад во јужната сириска покраина Кунејтра, објавија сириските медиуми, пренесува Анадолу.

Сириската телевизија „Ал-Ихбарија“ соопшти дека два израелски тенка, придружувани од група војници, навлегле во областа Тал ал-Дуријат, во близина на селото Ал-Муалака во руралниот дел на јужна Кунејтра.

Засега нема информации за евентуални апсења или жртви.

Упадот се случи по еден ден откако израелската Армија уби маж во јужна Сирија, под обвинение дека се обидел да влезе во воен пункт во зона што Израел ја нарекува „безбедносна област“.

Од падот на режимот на Башар ал-Асад на 8 декември 2024 година, Израел ги прошири своите воени операции во Сирија, при што неговите сили навлегуваат во демилитаризираната тампон-зона на окупираната Голанска Висорамнина и на блиските позиции.

Сирија побара израелските сили да се повлечат од окупираните територии и ја потврди својата посветеност на Договорот за неангажирање на силите од 1974 година, додека Израел тврди дека неговите дејства се мотивирани од безбедносни причини.