Израелските сили спроведуваат нови напади во сириските градови во јужна Кунеjтра

ИСТАНБУЛ (АА) - Израелските воени сили спроведоа нови напади во неколку сириски градови во југозападната покраина Кунејтра, соопштија локалните медиуми, јавува Анадолу.

Сириската арапска новинска агенција (САНА) објави дека израелска патрола составена од две возила „хамер“ тргнала од Тал Ахмар во јужната рурална област Кунејтра, се движела по патот кон Кудна и Аин Зиван пред да стигне до Сувaјсех.

Израелските сили беа распоредени во Сувајсех, каде што запираа и претресуваа цивили и го попречија движењето, објави медиумот.

Единицата на израелската Армија вчера нападна сириски жени и деца со димни гранати додека собирале печурки во областа помеѓу селата Ал-Аднанија и Рувајхина во северната рурална област Кунејтра.

Немаше непосреден коментар од израелската Армија или сириските власти за новите напади.

И покрај фактот дека сириската Влада не претставува закана, израелските сили постојано влегуваат на сириска територија и спроведуваат воздушни напади, убивајќи цивили и уништувајќи сириски воени објекти, возила, оружје и муниција.

Податоците на сириската Влада покажуваат дека од декември 2024 година, Израел извршил над 1.000 воздушни напади врз Сирија и повеќе од 400 прекугранични напади во јужните провинции.

По падот на режимот на Башар ал-Асад кон крајот на 2024 година, Израел ја прошири својата окупација на сириските Голански Висорамнини со заземање на демилитаризираната тампон-зона, потег со кој се прекрши договорот со Сирија од 1974 година.