Lina Altawell
25 Декември 2025•Ажурирај: 25 Декември 2025
КАРТУМ / ИСТАНБУЛ (AA) – Суданска медицинска група денес ја обвини паравоената група Сили за брза поддршка (RSF) дека држи 73 жени и 29 деца во градот Муглад, во сојузната држава Западен Кордофан, јавува Анадолу.
Суданската мрежа на лекари соопшти дека силите на РСФ ги привеле жените и девојчињата во градот Бабануса и ги префрлиле во Муглад под обвинение дека имаат роднини кои служат во суданската Армија.
Според соопштението, притворените лица се држат под „исклучително лоши хуманитарни услови“, без основна здравствена заштита, храна и психолошка поддршка.
Групата нагласи дека притворањето жени и деца претставува „сериозно кршење на меѓународното хуманитарно право и на меѓународните договори кои забрануваат нишанење цивили или нивно користење како средство за притисок во вооружени конфликти“.
Суданската мрежа на лекари ја смета раководната структура на РСФ за целосно одговорна за безбедноста на притворените и повика на нивно итно и безусловно ослободување, безбедно обединување со нивните семејства, како и итен пристап за хуманитарните и медицинските организации со цел обезбедување неопходна грижа.
Воедно, групата ги повика Обединетите нации, како и меѓународните и регионалните организации, да извршат притисок врз лидерите на РСФ за прекин на ваквите прекршувања и обезбедување заштита на цивилите, особено на жените и децата.
Бунтовничката група го зазеде градот Бабануса на 2 декември по интензивни борби со суданската Армија.
Трите држави на регионот Кордофан – Северен, Западен и Јужен Кордофан – со недели се сцена на жестоки судири меѓу Армијата и РСФ, поради што десетици илјади луѓе беа принудени да ги напуштат своите домови.
Од вкупно 18 сојузни држави во Судан, РСФ ја контролира целата област Дарфур на запад, освен делови од Северен Дарфур кои сè уште се под контрола на Армијата. Суданската Армија, пак, контролира поголем дел од преостанатите 13 држави на југот, северот, истокот и центарот на земјата, вклучително и главниот град Картум.
Конфликтот меѓу суданската Армија и Силите за брза поддршка, што започна во април 2023 година, досега однесе илјадници животи и принуди милиони луѓе да станат раселени.
