Илјадници раселени поради тајфунот Матмо кој по вторпат ја зафаќа јужна Кина

ИСТАНБУЛ (АА) – Тајфунот Матмо, 21-та именувана бура во сезоната на тихоокеански тајфуни во 2025 година, расели илјадници луѓе откако вчера по вторпат го зафати континенталниот дел кај автономниот регион Гуангси Жуанг во јужна Кина, објави државната новинска агенција Синхуа, пренесува Анадолу.

Тајфунот донесе силни ветрови и обилни дождови во својот втор налет врз крајбрежните области на Гуангси, погодувајќи ги градовите Беихаи, Ќинџоу и Фангченганг.

Според општинското Биро за управување со вонредни состојби, заклучно со податоците до вчера наутро, тајфунот погодил 10.561 лице во Беихаи, принудил на раселување 10.003 лица и оштетил 3.400 хектари посеви.

Силните ветрови соборија над 4.000 дрвја во Беихаи, предизвикувајќи блокади на патиштата. Општинските службеници испратија работници да ги расчистат остатоците и да го нормализираат сообраќајот.

Градовите Ќинџоу и Фангченганг пријавија паднати дрвја и билборди, а персонал за итни интервенции е испратен на терен да ги расчисти остатоците и да ги реши проблемите со поплавувањето.

Тајфунот Матмо се движеше кон североисточен Виетнам вчера напладне, според регионалните метеоролошки власти, а се очекува силните ветрови и дождови да продолжат во некои делови од покраината Гуангкси.

Градовите Чонгзуо и Ќинџоу ги укинаа привремените сообраќајни контроли и постепено ги вратија железничките услуги, додека во Беихаи, во тек се напорите за санација во погодените области со помош на над 1.300 лица, 116 возила за итни интервенции и 1.730 генератори.

Со оглед на влијанието на тајфунот Матмо, Кинеското друштво на Црвениот крст започна итна акција во текот на вчерашниот ден делејќи вкупно 3.400 комплети хуманитарна помош за погодените области.

Претходно во неделата, тајфунот го имаше својот прв налет на континенталниот дел во јужната кинеска покраина Гуангдонг, предизвикувајќи евакуација на илјадници луѓе.