Necva Taştan Sevinç
25 Октомври 2025•Ажурирај: 27 Октомври 2025
ИСТАНБУЛ (АА) - Поранешната потпретседателка на Соединетите Американски Држави (САД), Камала Харис, наговести дека може повторно да се кандидира за претседателската трка во 2028 година, велејќи за Би-би-си дека сè уште се гледа себеси како личност со иднина во политиката и покрај поразот од Доналд Трамп на минатогодишните избори, пренесува Анадолу.
Во своето прво интервју во Велика Британија, кое ќе се емитува утре (недела), во извадоците кои беа споделени на веб-страницата на британскиот сервис, Харис рече дека е уверена дека жена ќе ја преземе Белата куќа „за време на животот на нејзините внуки, сигурно“, а кога е прашана дали тоа би можела да биде таа, таа одговори: „Можно е“.
„Не сум завршила“, рече Харис, разговарајќи за „Сандеј“ со Лаура Кунсберг. „Целата моја кариера ја живеев во служба, и тоа ми е во коските“.
Харис, која неодамна објави мемоари насловени „107 Дена“ за нејзината кратка кампања во 2024 година, ги отфрли анкетите на јавното мислење кои ја ставаат зад другите потенцијални кандидати од редот на кандидатите, вклучувајќи го и актерот Двејн Џонсон.
„Да ги слушав анкетите, немаше да се кандидирам за мојата прва или втората функција, а сигурно немаше да седам тука“, рече таа.
Камала Харис, исто така, го нарече Трамп „тиранин“ и истакна дека нејзините предупредувања за време на кампањата во 2024 година се покажале како точни.
„Тој рече дека ќе го вепонизира Министерството за правда - и го направи токму тоа“, рече таа.
Харис го наведе суспендирањето на американскиот комичар Џими Кимел по шегата за десничарите како пример за растечкото влијание на Трамп врз медиумите, обвинувајќи го американскиот претседател дека ги користи федералните агенции за да ги таргетира критичарите.
„Неговата кожа е толку тенка што не можеше да издржи критики преку шега и се обиде да затвори цела медиумска организација во тој процес“, рече Харис.
„Има многумина кои капитулираа од првиот ден“, рече Харис, обвинувајќи ги бизнис лидерите дека „се поклонуваат пред нозете на тиранин“ за да добијат политичка или финансиска наклонетост.
