Католиците во Алепо, Сирија, го одбележаа Божиќ

АЛЕПО (АА) - Додека Сирија почнува да се обновува и нормализира по падот на режимот на партијата Баас, католичките христијани во Алепо се собраа во Католичката црква за да го прослават Божиќ, јавува Анадолу.

Христијаните во градот, уживајќи во стабилноста и мирот под контрола на групите што го соборија режимот, го дочекаа празникот со надеж и единство.

Католичката црква, подготвена за оваа пригода, имаше поставено новогодишна елка украсена со светилки и празнични украси, создавајќи топла и пријатна атмосфера.

Стотици христијани од сите возрасни групи ја исполнија црквата, собирајќи се заедно, посакувајќи желби за мир и хармонија.

Прославата беше обележана со молитви и духовни песни, со срдечна атмосфера на заедништво.

Поради католичкиот Божиќ новото раководство на Сирија ги прогласи 25 и 26 декември за официјални празници во земјата, а државните институции ќе останат затворени за време на празникот.

Башар ал Асад, лидер на Сирија речиси 25 години, побегна во Русија откако антирежимските групи ја презедоа контролата над Дамаск на 8 декември, ставајќи крај на режимот на партијата Баас, која беше на власт од 1963 година.

Преземањето на власта дојде откако борците на Хајат Тахрир ал-Шам ги освоија клучните градови во молскавична офанзива што траеше помалку од две недели.