Кина воведува часови по вештачка интелигенција во основните и средните училишта

ИСТАНБУЛ (АА) - Кина планира да воведе часови за вештачка интелигенција (АИ) за учениците од основните и средните училишта за да ги поттикне нивните таленти за оваа тема, пренесува Анадолу.

Почнувајќи од претстојниот есенски семестар, децата во главниот град Пекинг ќе можат да земат најмалку осум часови настава за вештачка интелигенција по академска година, објави државната новинска агенција „Синхуа“, цитирајќи ја Општинската комисија за образование на Пекинг.

Часовите за вештачка интелигенција се на располагање одделно или заедно со други предмети како информатичката технологија.

Основните училишта ќе нудат практични курсеви за вовед во концептите на вештачка интелигенција, додека средните училишта ќе обезбедат часови кои се фокусираат на користење на вештачката интелигенција во учењето и секојдневниот живот. На повисоките класови во средните училишта ќе им се понудат практични курсеви насочени кон подобрување на примената и иновациите во вештачката интелигенција.

Кинескиот стартап „Дипсик“ ја разбранува индустријата за вештачка интелигенција на почетокот на оваа година со својот рентабилен и бесплатен чет-бот поради брзиот напредок во ривалството со „Чат ЏПТ“ на „ОпенАИ“ со седиште во САД, со многу помалку ресурси, добивајќи невидена популарност во продавниците за мобилни апликации низ целиот свет.

Кинескиот претседател Си Ѓинпинг минатиот месец одржа состанок со технолошките лидери и претприемачи, за време на кој ги охрабри деловните лидери да го максимизираат својот потенцијал, нагласувајќи „Вистинско време е приватните претпријатија и претприемачите целосно да го искористат својот потенцијал“.

Други кинески технолошки компании, исто така, започнаа иницијативи за вештачка интелигенција, како моделот со вештачка интелигенција на „Алибаба“, „КвК-32Б“, и генералниот агент за вештачка интелигенција „Манус“.

Кинеското Министерство за образование минатиот декември објави дека наставата за вештачка интелигенција во основните и средните училишта ќе биде унапредена, со цел да се промовира соработката помеѓу индустријата, академската фела и истражувањето.