Малезија го осуди упадот на израелските доселеници и високи официјални претставници во Ал Акса

Малезија денес „најостро“ го осуди најновиот масовен упад во комплексот на џамијата „Ал Акса“ во окупираниот Источен Ерусалим, во кој учествувале повеќе од илјада „нелегални“ израелски доселеници и високи израелски официјални претставници, јавува Анадолу.

„Намерното упаѓање во џамијата Ал Акса претставува сериозно прекршување, го поткопува воспоставениот историски и правен статус кво на светото место и претставува очигледен обид за создавање нова реалност на терен“, се наведува во соопштението на Министерството за надворешни работи на Малезија.

„Повторените упади на израелските доселеници и високи официјални претставници претставуваат флагрантно прекршување на меѓународното право и воспоставениот историски и правен статус кво со кој се уредува комплексот на џамијата“, се додава во соопштението.

„Овие дејствија не се изолирани провокации, туку се дел од континуираните обиди на ционистичкиот израелски режим да го промени идентитетот и карактерот на џамијата Ал Акса и окупираниот Источен Ерусалим“, се наведува понатаму.

Малезија „категорично“ ги отфрли сите такви обиди и нагласи дека светоста на џамијата „Ал Акса“ и верските права на муслиманските верници мора целосно да бидат почитувани и заштитени.

Куала Лумпур ја повика меѓународната заедница, особено Советот за безбедност на ОН, да преземе „итни и конкретни“ мерки за да го принуди „ционистичкиот израелски режим“ веднаш да престане со ваквите намерни и флагрантни прекршувања.

„Ционистичкиот израелски режим мора да одговара за континуираните обиди за поткопување на историскиот и правниот статус кво на Ал Харам ал Шариф“, се наведува во соопштението.

Малезија ја потврди својата „непоколеблива“ солидарност со палестинскиот народ и неговото неотуѓиво право на самоопределување, повторувајќи ја својата долгогодишна поддршка за формирање независна и суверена држава Палестина во границите пред 1967 година, со Источен Ерусалим како главен град.

Стотици израелски доселеници во понеделникот упаднаа во комплексот на џамијата „Ал Акса“ во окупираниот Источен Ерусалим под заштита на израелската полиција, за време на еврејскиот празник Сукот.