Rabia İclal Turan
15 Септември 2026•Ажурирано: 15 Септември 2026
Првиот извештај на генералниот инспектор на Пентагон за влијанието на војната на САД против Иран покажа дека муницијата потрошена за време на четиримесечната кампања предизвикала „недостиг во стратегиските залихи“ и открила тесни грла во капацитетот на американската одбранбена индустриска база за обновување на залихите со оружје, јавува Анадолу.
Извештајот, што го опфаќа периодот од 1 април до 30 јуни и е подготвен во рамките на надзорот на главниот генерален инспектор за операцијата „Епска фурија“ (OEF), се повикува на наводите од Канцеларијата на потсекретарот за одбрана за набавки и одржување, според кои потрошувачката на муниција „резултирала со недостиг во стратегиските залихи и открила тесни грла во индустриската база за дотур на муниција“.
За да се надмине овој проблем, во извештајот се наведува дека Пентагон „работи на поедноставување на процесите на набавка и скратување на времето потребно за производство, како и на создавање резерви од клучни материјали, компоненти и одредени видови муниција, со цел брз одговор на евентуални вонредни ситуации“.
Во извештајот се истакнува дека на одбранбената индустриска база ѝ е потребно „значително време за подготовка и реализација“ за да ги прошири производствените капацитети, при што најголемите тесни грла се јавуваат во производството на мотори за ракети на цврсто гориво, достапноста на висококвалитетни експлозиви и погонски полнења, како и во ангажирањето квалификувана работна сила за производство.
Американскиот претседател Доналд Трамп и министерот за одбрана Пит Хегсет постојано ги демантираа медиумските извештаи за исцрпени залихи на муниција кои наводно ги ограничиле воените опции против Иран.
Трамп минатиот месец изјави дека САД располагаат со „огромни количества“ муниција и дека одбранбените компании на земјата градат „најголем број погони и фабрики во историјата на нашата земја“.
Според извештајот, Пентагон ја проценил вкупната цена на војната со Иран на 33,4 милијарди долари заклучно со 29 јуни, вклучувајќи 22,3 милијарди долари за потрошена муниција и 3,7 милијарди долари за загуби на опрема, пресметани според трошоците за нивна замена.
Оваа процена не ги вклучува трошоците за поправка на инфраструктурата.
Хегсет на 21 јули пред Конгресот изјави дека без дополнителни средства, Пентагон „би можел да се соочи со критичен недостиг“, што би ја загрозило неговата способност да им исплаќа плати на припадниците на Вооружените сили, да ја обновува опремата и муницијата и да ги одржува своите глобални операции.
Белата куќа на 24 јуни до Конгресот поднесе барање за итни дополнителни средства во висина од 87,6 милијарди долари, од кои 67,1 милијарда долари се наменети за Пентагон, а 21 милијарда долари се специјално одвоени за муниција. Според извештајот, седум припадници на Американските вооружени сили загинале во борбени дејства за време на американско-израелската војна против Иран, а седуммина настрадале во инциденти што не биле поврзани со борбени дејства во периодот од 28 февруари до 30 јуни; притоа, 417 лица биле ранети. Во извештајот се додава дека уште четворица загинале во борбени дејства во текот на јули.
