Од почетокот на руската операција во Украина загинати 6 странски новинари

ЖЕНЕВА (АА) – Организацијата „Press Emblem Campaign“ (PEC) со седиште во Женева соопшти дека од почетокот на војната во Украина на 24 февруари во земјата работат 3.000 странски новинари, а шест го загубиле животот, десетици се ранети и двајца киднапирани од руските сили, пренесува Агенција Анадолија (АА).

Новинарите ги изгубија животите под различни околности, од шрапнели по ракетен напад до рани од куршуми, соопшти Организацијата за безбедност и правата на медиумите.

Половина од загинатите новинари покривале битки во близина на Киев и во близина на градот Ирпин.

„Press Emblem Campaign изразува сериозна загриженост и го осудува убивањето на новинарите во Украина, кои известуваа од теренот по руската инвазија, ги повикува сите засегнати страни да ја почитуваат слободата на медиумите“, рече Нава Такурија од „Press Emblem Campaign“.

„Сите жртви, меѓу кои и Шакиров Дилербек Шукурович, кој загина на 26 февруари во подрачјето на Керсон; Јевхени Сакун во Киев на 1 март; Виктор Дудар во Миколаев на 4 март; Брент Ренауд во Ирпин на 13 март; Пјер Закржевски во Хоренка на 14 март и Олександра Куршинова во Хоренка на 14 март беа на терен за да известуваат од војната“, соопшти ПЕК.

„Киднапираните новинари работеа на југот на земјата, каде што Русија окупираше територии“, изјави Андриј Ианицки, претставник на ПЕК во Украина.