ОН: Во училиште во Деир ал-Балах во страшни услови живеат над 16.000 раселени Палестинци

ГАЗА (АА) - Од Обединетите нации (ОН) информираат дека повеќе од 16.000 раселени Палестинци живеат во страшни услови во училиште во Деир ал-Балах во централниот дел на Појасот Газа, известува Анадолу.

Во соопштението на Агенцијата на Обединетите нации за помош на палестинските бегалци на Блискиот Исток (УНРВА) се укажува на борбата за опстанок на Палестинците кои се раселени во Појасот Газа.

Со соопштението се објавени и фотографии од училиштето во кое живеат палестинските семејства.

„Во моментов повеќе од 16.000 луѓе живеат во ова училиште на УНРВА во Деир ал-Балах. Семејствата живеат во училници, ходници и импровизирани засолништа од пластика. Условите за живот се ужасни, ресурсите се дефицитарни, просториите за лична хигиена се неадекватни, а материјалите се исклучително ограничени“, се наведува во соопштението.

Израелските сили од 7 октомври минатата година спроведуваат континуирани напади врз Појасот Газа во кој присилно се раселени околу два милиона жители од вкупната популација од околу 2,3 милиони.

Во израелските бомбардирања и гранатирања врз Појасот Газа досега се убиени најмалку 36.224 Палестинци, вклучително 15.328 деца и 10.171 жени, а ранети се 81.777 лица.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти, да преземе мерки за да обезбеди хуманитарна помош за цивилите во Газа и веднаш да ја прекине операцијата во Рафа, град на југот на Појасот Газа, во кој засолниште побараа повеќе од еден милион раселени Палестинци.

И покрај тоа, израелските напади врз Појасот Газа продолжуваат со несмален интензитет, а испораката на хуманитарната помош не е доволна за решавање на хуманитарната катастрофа.