Пекинг: Кина разговара за можна средба меѓу Си, Путин и Трамп

Пекинг денес соопшти дека е во комуникација со засегнатите страни во врска со можниот трилатерален самит меѓу лидерите на Кина, Русија и САД подоцна овој месец, објавија државните медиуми, пренесува Анадолу.

„Кина одржува комуникација со засегнатите страни во врска со средба на шефовите на држави на Кина, Русија и САД“, изјави портпаролката на кинеското Министерство за надворешни работи, Мао Нинг, пред новинарите во Пекинг.

Таа одговараше на наводите на „Фајненшал тајмс“ дека претставници на трите земји ги координираат подготовките за таква средба на маргините на претстојниот Самит на лидерите на Азиско-пацифичката економска соработка (АПЕК), што ќе се одржи на 18 и 19 ноември во Шенжен, во југоисточна Кина, објави весникот „Глобал тајмс“, со седиште во Пекинг.

Кинескиот претседател Си Ѓинпинг ќе биде домаќин на лидерите и претставниците на 21 економија членка на АПЕК, меѓу кои и рускиот претседател Владимир Путин и американскиот претседател Доналд Трамп.

„Во тек се подготовки за организирање на таква средба“, изјави портпаролот на Кремљ, Дмитриј Песков, за британскиот весник.

„Едно лице запознаено со разговорите изјави дека Вашингтон и Москва вршат притисок врз Кина да се согласи на средба“, објави весникот вчера.