Servet Günerigök
18 Октомври 2023•Ажурирај: 18 Октомври 2023
ВАШИНГТОН (АА) - Американското Министерство за одбрана (Пентагон) соопшти дека му обезбедува безбедносни системи на Израел за да ја елиминира палестинската група Хамас и дека тоа не значи убивање невини цивили во Палестина, јавува Анадолу.
„Ние секако му ги даваме на Израел безбедносните системи кои му се потребни да го отстрани и ефективно да го потисне Хамас во Газа. Тоа не значи убивање на невини цивили“, рече заменик-секретарката за медиуми, Сабрина Синг, на брифингот со новинарите.
Нејзината изјава дојде како одговор на прашање за вестите за израелски напад врз баптистичката болница Ал-Ахли во Газа.
„Свесна сум за вестите, но немам што да понудам повеќе во овој момент“, рече таа за нападот, во кој загинаа стотици луѓе.
Пофалувајќи ја израелската армија како „многу способна и професионална“, Синг рече: „Ние веруваме дека безбедносната помош што тие ја користат во Газа ќе се користи правилно, и ќе се користи за таргетирање на Хамас, но и овозможување хуманитарна помош за цивилите.“
Синг истакна дека американските официјални претставници продолжуваат со своите контакти со Израелците за да се осигураат дека цивилите во Газа го имаат она што им е потребно, и дека можат да бидат евакуирани во безбедни области.
Над 500 лица загинаа во израелски воздушен напад врз баптистичката болница Ал-Ахли во Газа, изјави за Анадолу портпаролот на Министерството за здравство, Ашраф ал-Кудра.
На снимките од местото на нападот се гледаат трупови во кругот на болницата.
