ПЛО: Израел сака да ги истреби Палестинците од северниот дел на Појасот Газа

РАМАЛА (АА) - Националниот совет на Палестинската ослободителна организација (ПЛО) објави дека она што се случува на северот на Појасот Газа е војна што Израел ја води за да ги истреби Палестинците од тоа подрачје, известува Анадолу.

Претседателот на Националниот совет на ПЛО, Рухи Фатух, истакна дека Израел продолжува да извршува напади на северот на Појасот Газа.

„Израелската армија окупира станбени области за геноцидни цели и бомбардира објекти“, рече тој.

Фатух ги нарече израелските напади „морален колапс што човечкиот ум не може ни да го замисли“.

„Таквото однесување го одразува фактот дека окупаторите воопшто не се грижат за принципите на меѓународното хуманитарно право и човековите права“, рече Фатух.

Тој посочи дека е јасно дека многу западни земји и Соединетите Американски Држави (САД) го поддржуваат Израел.

„Сите овие злосторства се јасен доказ за злоупотребата на меѓународниот молк, дури се негира угнетувањето што го вршат окупаторските сили, кои имаат заштита и поддршка од Западот и САД“, рече Фатух.

Прекршувајќи ја резолуцијата на Советот за безбедност на ОН која повикува на итен прекин на огнот, Израел ја продолжи својата брутална офанзива врз Појасот Газа од 7 октомври 2023 година.

Во израелските бомбардирања и гранатирања, според локалните здравствени власти, убиени се повеќе од 42.800 Палестинци, главно жени и деца, а над 100.500 се повредени.

Израелските напади го принудија на раселување речиси целото население на Појасот Газа во текот на континуираната блокада која доведе до сериозен недостиг на храна, чиста вода и лекови.

Израел е обвинет за геноцид пред Меѓународниот суд на правдата.