По подолга пауза започна Светскиот економски форум во Давос

ДАВОС (АА) - Глобалните лидери, креатори на политики и активисти се собраа денес на Светскиот економски форум (СЕФ) во Давос, Швајцарија, по двегодишна пауза поради пандемијата на коронавирусот, јавува Агенција Анадолија (АА).

Оваа година актуелната војна меѓу Русија и Украина е главна тема на форумот. Фокусот е и на влијанието на пандемијата на Ковид-19, климатските промени и улогата на мултилатерализмот за мир во Европа.

Форумот беше отворен со обраќање на украинскиот претседател Владимир Зеленски, кој преку видеоврска зборуваше од Киев, додека во салата во Давос присуствуваше министерот за надворешни работи на Украина, Дмитро Кулеба, и значајна делегација на други високи украински претставници.

Претседателот на Украина, Зеленски, ги повика меѓународните компании да работат и да инвестираат во Украина, а не во Русија.

Шефицата на Меѓународниот монетарен фонд (ММФ), Кристалина Георгиева, исто така предупреди дека глобалната економија може да се соочи со најголемиот тест од Втората светска војна.

„Можеме да започнеме сега со намалување на трговските бариери за да го ублажиме недостигот и да ги намалиме цените на храната и другите производи. Не само земјите, туку и компаниите мора да го диверзифицираат увозот за да обезбедат синџири на снабдување“, рече Георгиева.

Форумот последен пат одржан во јануари 2020 година, познат и како Самит во Давос, се одложува две години по ред поради пандемијата на коронавирусот, а како алтернатива се одржуваат онлајн состаноци.

На форумот, што за прв пат во историјата нема да се одржи во јануари, се очекува да присуствуваат 50 државни лидери, 300 владини претставници и околу 2.500 светски деловни претставници.

Темата на овогодинешниот состанок на СЕФ, што ќе заврши на 26 мај, е „Датум на пресвртница: владини политики и бизнис светски стратегии“.

Давос е швајцарско гратче во Алпите во кое живеат околу 11.000 жители. Местото ја стекнало вистинската слава пред повеќе од сто години со романот „Магичен брег" од Томас Ман, но веќе пет децении е познато како место кое ја собира економската и политичката елита.

Светскиот економски форум пред пет децении го основа Клаус Шваб со цел да го поправи светот во кој живее. На темелот на проектот на Шваб, Давос стана модерен центар на капитализмот.