Полска ја обвини Русија за киберагресија за дестабилизација на земјата

АТИНА (АА) - Висок полски претставник ја обвини Русија за ескалација на кампањата на кибернапади кон голем број веб-страници во Полска, пренесува Анадолу.

„Хакерска група (Noname057), која дејствува во името на руските специјални служби, објавува повеќе информации за напади врз полски веб-страници. Овие активности се пример за употреба на киберагресија за да се влијае врз јавното расположение за време на изборната кампања“, истакна државниот секретар од Кабинетот на премиерот, Станислав Зарин, на платформата Х.

Тој рече дека хакерите наведуваат дека нападите се одговор на политиката на полската Влада и „русофобијата“ на полските власти што полското општество, наводно, ја отфрла.

„Руските служби користат хакери за да пратат порака до Полјаците во која сугерираат дека промената на 'русофобните' власти на Полска ќе ги запре нападите“, рече Зарин.

„Цел на Русија е да ја заплаши Полска, да ги дестабилизира државата и општеството и да влијае врз Полјаците за време на изборниот период да ја коригираат политиката на Варшава кон Русија и Украина“, истакна тој.

Полската Агенција за внатрешна безбедност, полицијата и железничките компании овој месец започнаа истрага откако еден викенд беа емитувани радиосигнали за итно сопирање, со што беа запрени и одложени речиси 100 воза во северозападните и североисточните делови на земјата.

Канцеларијата на националното обвинителство соопшти дека за инцидентот се товарат две лица, од кои еден јавен службеник. Ним им се заканува затворска казна до осум години.