Путин и Меркел телефонски разговараа за Либија

МОСКВА (АА) - Рускиот претседател, Владимир Путин. телефонски разговараше со германската канцеларка, Ангела Меркел, за неодамнешниот развој на либиската криза и за подготовките за претстојната конференција во Берлин за решавање на оваа криза, јавува Агенција Анадолија (АА).

„Беше дискутиран процесот за подготовка на меѓународната конференција во Берлин за решавање на либиската криза“, се вели во соопштението на Кремљ.

Во соопштението се додава дека Путин исто така ја информирал Меркел за разговорите за Либија во Москва на кои присуствувале претставници на обете страни на конфликтот.

Вчера портпаролот на германската Влада соопшти дека Берлин на 19 јануари ќе биде домаќин на меѓународна конференција за конфликтот во Либија.

Либиската Влада во Триполи признаена од Обединетите нации (ОН) и силите лојални на генералот Калифа Хафтар во саботата го прифатија заедничкиот повик на Турција и Русија за прекин на огнот.

Либискиот премиер, Фајез ал Сараџ, и Хафтар пристигнаа денес во Москва за да разговораат за условите за договорот за прекин на огнот.

Хафтар во април започна офанзива за заземање на Триполи од Владата признаена од ОН.

Според податоците на ОН, повеќе од 1.000 лица се убиени од почетокот на операцијата, а повеќе од 5.000 се повредени.

Либија е средиште на длабока политичка и безбедносна криза од 2011 година, кога беше убиен Моамер Гадафи. Оттогаш се води борба за доминација меѓу ривалските табори со седиште во Триполи и Тобрук.