Руанда започна со вакцинација против вирусот Марбург

КИГАЛИ (АА) - Руанда започна со тестирање на вакцини за вирусот Марбург, соопштија здравствените власти, јавува Анадолу.

На брифинг за новинарите, министерот за здравство Сабин Нсанзимана рече дека земјата ги добила првите 700 дози вакцина од Институтот за вакцини „Сабин“ со седиште во Соединетите Американски Држави (САД) за почеток на кампањата за популацијата под висок ризик од заразување со смртоносниот вирус, како што се здравствените работници и лицата за контакт со пациентите заразени со вирусот Марбург.

Истакнувајќи дека се очекуваат повеќе дози, Нсанзимана ги увери жителите на Руанда во однос на загриженоста за безбедноста на вакцината, нагласувајќи дека вакцината е испробана во соседните Уганда и Кенија.

Најмалку 46 луѓе, од кои 12 мртви, се потврдени дека се заразиле со вирусот, покажуваат податоците до саботата.

Властите во Руанда воведоа низа мерки за контрола на ширењето на вирусот од неговото избивање во земјата минатиот месец, вклучително и забрана за посети на хоспитализирани пациенти и ограничување на собирите.

Вирусот Марбург е во исто семејство со вирусот што ја предизвикува еболата, високо вирулентна болест која предизвикува хеморагична треска, со стапка на смртност до 88 %, според Светската здравствена организација.

Болеста предизвикана од вирусот Марбург започнува нагло, со висока температура, силни главоболки и тешка малаксаност.

Многу пациенти развиваат тешки хеморагични симптоми во рок од седум дена.

Вирусот се пренесува на луѓето од големите лилјаци и се шири меѓу луѓето преку директен контакт со телесните течности на заразени луѓе, површини и материјали.