Сирија: Фотографии од централниот затвор во Деир ез-Зор, каде што беа измачувани илјадници луѓе

ДЕИР ЕЗ-ЗОР (АА)

Илјадници луѓе беа измачувани зад ѕидовите на централниот затвор Деир ез-Зор, кој однадвор до пред околу еден месец изгледаше како напуштен, тивок објект.

Илјадници луѓе, вклучувајќи жени и деца, со години беа затворени во мрачниот свет на овој објект.

Новинарите на АА влегоа во централниот затвор Деир ез-Зор, кој се смета за еден од центрите каде што се занемарува човечкото достоинство, и изработија фотографии од нехуманите услови внатре.

Натписот на надворешниот ѕид на централниот затвор Деир ез-Зор, некогаш еден од најголемите центри поврзани со режимското Министерство за внатрешни работи, започнува со „Уништување, темнина и смрт“ и го открива духот на овој центар.

Затворот, каде симболите на режимот на Баас можат да се видат на секој агол, е претворен во ѓубриште.

Во затворот, каде во дворот има распаднати полициски возила, впечатливи се изгорени кревети на кат, ѕидови покриени со саѓи, како и ќелии и одделенија кои се претворени во ѓубришта.

На фотографиите може да се забележат имиња на голем број луѓе врежани на ѕидовите на ќелиите и одделенијата, чија судбина сѐ уште е непозната.

По падот на режимот на Баас на 8 декември, ослободени беа оние што беа затворени во централниот затвор Деир ез-Зор.

- „Мора да одговараат сите елементи на режимот“

Басил Кувајхи, кој 88 дена беше задржан во централниот затвор Деир ез-Зор, за АА изјави дека е ослободен по падот на режимот.

Кувејхи изјави дека биле подложени на многу лош третман и додаде:

„До последниот ден внатрешните безбедносни сили правеа притисок врз нас, нѐ тепаа, користеа и солзавец. Ни кажуваа зборови кои не можат да се опишат. Дури и инвалидите кои не можеа да се движат ги влечеа по ходниците. Не ги почитуваа ниту постарите. Цели 5 часа нѐ држеа на сеџаде. Ни забранија со часови да одиме во тоалет. Пукаа од огнено оружје врз луѓето и ги повредуваа.“

Опишувајќи го режимот на Баас како „многу суров и деспотски режим“, Кувејхи рече: „Сите елементи на режимот мора да бидат повикани на одговорност. Не само врховните имиња, мора да одговара секој којшто малтретирал луѓе. Еднаш кога се побунивме еден млад човек беше застрелан во глава од снајперист во двор и почина. Нѐ тепаа и користеа солзавец. Постарите беа погодени од солзавецот, но никој не им помогна. Нас така немилосрдно нѐ нападнаа што, се колнам дека дури и Израел е помилостив од нив“.