УКМТО: Брод погоден од непознат проектил во Ормускиот Теснец

Брод бил погоден од непознат проектил додека пловел низ Ормускиот Теснец кон отворено море, соопшти рано утринава Центарот за поморски трговски операции на Обединетото Кралство (УКМТО), јавува Анадолу.

„Според наводите на офицерот за безбедност, бродот бил погоден од непознат проектил додека пловел низ Ормускиот Теснец кон отворено море. При ударот е причинета штета на машинската просторија и е повреден член на екипажот“, се наведува во соопштението.

Останатите членови на екипажот добиваат помош од Оманската крајбрежна стража, соопшти УКМТО.

Надлежните органи го истражуваат инцидентот, а засега нема пријавено штети по животната средина, се додава во соопштението.

УКМТО ги советуваше бродовите што транзитираат низ Ормускиот Теснец да бидат претпазливи и да пријавуваат каква било сомнителна активност.

Тензиите во Ормускиот Теснец се зголемени во услови на војната меѓу САД и Иран, што предизвикува стравувања од нарушувања на поморскиот сообраќај и глобалното снабдување со енергенси и покрај дипломатските напори за постигнување договор за непречено пловење низ овој стратегиски воден пат.