„Туркиш ерлајнс“ го финализираше договорот за 150 авиони „Боинг 737 МАКС“

„Туркиш ерлајнс“ го финализираше договорот со „Боинг“ за набавка на до 150 авиони „737 МАКС“, што претставува најголемата поединечна нарачка на авиони со тесен труп од оваа компанија досега, јавува Анадолу.

Договорот, постигнат по преговорите започнати во 2025 година, е дел од долгорочната стратегија за раст на „Туркиш ерлајнс“ и има цел да ја зајакне мрежата на кратки и средни релации на авиокомпанијата, како и да го поддржи проширувањето на нејзината флота.

Договорот беше финализиран во присуство на турскиот претседател Реџеп Таип Ердоган.

Според договорот, „Туркиш ерлајнс“ ќе нарача 100 авиони „Боинг 737-8“, со можност за дополнителни 50 авиони „Боинг 737 МАКС“.

Договорот исто така ѝ овозможува на авиокомпанијата да ја искористи можноста за преминување на моделот „Боинг 737-10“, најголемиот член на семејството „737 МАКС“.

Оваа флексибилност ќе му овозможи на „Туркиш ерлајнс“ да го приспособува капацитетот на флотата според побарувачката на патниците и оперативните потреби во својата мрежа.

„Овој договор претставува важен чекор во согласност со нашата стратегија за проширување на флотата“, изјави Мурат Шекер, претседател на Одборот и Извршниот комитет на „Туркиш ерлајнс“.

„Новите авиони 'Боинг 737 MAX' ќе донесат поголема ефикасност и флексибилност во нашето работење и ќе ја поддржат широката мрежа на летови што ја опслужуваме од нашиот центар во Истанбул“, додаде тој.

Стефани Поуп, претседателка и извршна директорка на „Боинг комерцијални авиони“, рече дека нарачката ја одразува „меѓусебната доверба и заедничката визија“ што го обликувале долгогодишното партнерство меѓу компаниите.

„Горди сме што продолжуваме да го поддржуваме 'Туркиш ерлајнс' во проширувањето на неговата мрежа со центар во Истанбул, поврзувајќи повеќе луѓе со повеќе дестинации низ светот, а истовремено поддржувајќи го воздухопловниот екосистем на Турција“, рече Поуп.

- Ефикасност во потрошувачката на гориво и проширување на мрежата -

Се очекува новите авиони да ги зајакнат операциите на „Туркиш ерлајнс“ на кратки и средни релации, особено на домашните и меѓународните линии со голема побарувачка.

Според авиокомпанијата, „Боинг 737-8“ нуди предности во однос на досегот и носивоста, а истовремено обезбедува 20 % помала потрошувачка на гориво и емисии во споредба со авионите што ги заменува. „Туркиш ерлајнс“ соопшти дека овие карактеристики ќе ѝ помогнат да одговори на променливите оперативни потреби додека ги проширува флотата и мрежата.

„Туркиш ерлајнс“ и неговата подружница „Аџет“ моментално управуваат со повеќе од 200 авиони „Боинг“, вклучувајќи ги моделите „737 МАКС“, „737 Некст џенерејшан“, „787 Дримлајнер“ и „777 Фрејтер“.

Најновиот договор следува по нарачката на „Туркиш ерлајнс“ за 75 авиони „Боинг 787 Дримлајнер“ во 2025 година, со што дополнително се продлабочува долгогодишната соработка меѓу авиокомпанијата и „Боинг“.

- Поширока индустриска соработка -

Покрај набавката на авиони, „Туркиш ерлајнс“ и „Боинг“ исто така развиваат долгорочна соработка насочена кон зајакнување на воздухопловната индустрија на Турција.

Двете компании оваа година потпишаа стратегиски Меморандум за разбирање (MoU) за индустриско учество, со кој се воспоставува рамка фокусирана на три области – развој на капацитетите, создавање вредност и деловни можности.

- „Голем ден за 'Боинг' и американското производство!“ -

Американскиот претседател Доналд Трамп вчера ги истакна договорите за набавка на авиони склучени со Турција и Бангладеш, оценувајќи дека тие претставуваат поттик за „Боинг“, американското производство и американскиот извоз.

„Голем ден за 'Боинг' и американското производство!“, напиша тој на својата платформа „Трут соушл“.

Трамп рече дека Турција и Бангладеш најавиле набавка на вкупно 111 авиони „Боинг“, со можност за дополнителни 50 авиони.

Тој му припиша заслуга на американскиот министер за трговија Хауард Лутник и Министерството за трговија за поддршката на договорите, велејќи дека тие ќе генерираат продажба вредна десетици милијарди долари и значително ќе го зголемат американскиот извоз.

Трамп исто така рече дека договорите ќе поддржат десетици илјади работни места во САД.

„Пазарот го препознава она што 'Боинг' и јас го знаеме отсекогаш: кога произведувате во Америка, извезувате од Америка и ги поддржувате американските работници, ја правите вашата компанија посилна“, рече тој.