УНХЦР: Над 2 милиони Сиријци се вратиле во татковината од декември

ИСТАНБУЛ (АА) - Шефот на Обединетите нации за бегалци денес соопшти дека повеќе од 2 милиони Сиријци се вратиле во Сирија од декември, јавува Анадолу.

„Над два милиони сириски бегалци и раселени лица се вратија дома од декември - знак на надеж во услови на зголемените регионални тензии“, напиша високиот комесар на ОН за бегалци (УНХЦР) Филипо Гранди на платформата X.

Нагласувајќи дека е на пат од Либан кон Сирија по повод Светскиот ден на бегалците, Гранди ја повтори потребата од „политичко решение“ во Сирија.

„Ова докажува дека ни требаат политички решенија - а не уште еден бран на нестабилност и раселување“, нагласи тој.

По години страдање и тешкотии во бегалските кампови, илјадници сириски цивили почнаа да се враќаат во својата татковина, додека мирот и безбедноста продолжуваат да преовладуваат во Сирија по падот на режимот на Башар ал-Асад.

Милиони Сиријци избегаа од земјата во соседните држави барајќи безбедност во услови на масовна деструкција и влошување на хуманитарната криза под режимот на Асад.

Асад, лидерот на Сирија речиси 25 години, избега во Русија во декември, со што заврши режимот на партијата Баас, која беше на власт од 1963 година.

Ахмед ал-Шара, кој ги предводеше антирежимските сили за соборување на Асад, беше прогласен за претседател за транзицискиот период кон крајот на јануари.