Четиригодишното палестинско девојче Разан Абу Захир почина од неисхранетост

СКОПЈЕ (АА) - Четиригодишното палестинско девојче Разан Абу Захир почина од неисхранетост и недостаток на храна за бебиња на 20 јули 2025 година, во Деир ал Бала, во Појасот Газа.

Министерството за здравство на Газа соопшти дека тековните недостатоци им се закануваат на животите на повеќе од 60.000 деца, а владината Канцеларија за медиуми објави дека досега повеќе од 70 деца ги загубиле животите од истата причина.

Блокирањето на испораките на помош од страна на Израел и затворањето на граничните премини за влез на основните прехранбени и медицински производи продолжуваат да ја продлабочуваат и онака катастрофалната хуманитарна криза во регионот.

Агенцијата на ОН за палестински бегалци (УНРВА) во неделата повторно ги обвини израелските власти дека го користат гладувањето како оружје во војната против цивилното население во Газа.

Во соопштението објавено на социјалната мрежа X, УНРВА наведе:

„Израелските власти ги изгладнуваат цивилите во Газа. Меѓу нив има 1 милион деца“.

УНРВА го обнови својот итен повик за укинување на тековната опсада на Израел врз Појасот Газа, велејќи:

„Укинете ја опсадата: дозволете ѝ на УНРВА да донесе храна и лекови“.

И покрај меѓународните законски обврски за заштита на цивилите и дозволување на испорака на помош, Израел спроведува целосна опсада на Газа од 2 март, бомбардирајќи конвои, блокирајќи гранични премини и целејќи ги точките за дистрибуција на хуманитарна помош - дејствија кои се широко осудени како облик на колективна казна и потенцијални воени злосторства.

Израел во Газа уби речиси 59.000 Палестинци, повеќето од нив жени и деца, од октомври 2023 година. Со немилосрдното бомбардирање со кое ја уништи енклавата и целосната блокада, Израел речиси го урна здравствениот систем во Газа и предизвика населението да се соочи со глад.