Шефот на СЗО: Палестинските деца и цивили заслужуваат да живеат во мир

ЖЕНЕВА (АА) - Палестинските деца и цивили „заслужуваат да живеат во мир“, изјави денес шефот на Светската здравствена организација (СЗО), Тедрос Аданом Гебрејесус, по повод одбележувањето на Меѓународниот ден на солидарноста со палестинскиот народ, јавува Анадолу.

„Овој Меѓународен ден на солидарност со палестинскиот народ доаѓа во многу мрачен и трагичен момент. Но ние мора да истраеме во нашата посветеност на здравјето на целиот палестински народ. Продолжуваме да ги повикуваме сите страни да работат на траен прекин на огнот и траен мир“, рече Гебрејесус.

Во друга објава тој нагласи дека во моментов 1,3 милиони луѓе живеат во засолништа во Појасот Газа.

Тој рече дека пренатрупаноста, недостигот на храна, вода, санитарни услови и основна хигиена, управувањето со отпадот и пристапот до лекови резултираат со голем број случаи на акутни респираторни инфекции (111.000), шуга (12.000), вошки (11.000), дијареја ( 75.000), исипување на кожата (24.000), импетиго (2.500), сипаници (2.500) и жолтица (1.100).

„Со оглед на условите за живот и недостигот на здравствена заштита, повеќе луѓе би можеле да умрат од болести отколку од бомбардирање“, предупреди шефот на СЗО.

Гебрејесус нагласи дека сегашното воспоставување прекин на огнот е „прашање на живот или смрт за цивилите“.