Шехбаз Шариф е избран за нов премиер на Пакистан

ИСЛАМАБАД (АА) - Пакистанскиот Парламент денес го избра поранешниот опозициски лидер Шехбаз Шариф за нов премиер на земјата, јавува Агенција Анадолија (АА).

Шехбаз, помладиот брат на трикратниот поранешен премиер Наваз Шариф, и заеднички кандидат на комбинираната опозиција, обезбеди 174 гласа во Долниот законодавен дом од 342 члена на Националното собрание.

За просто мнозинство во Парламентот беа потребни минимум 172 гласа.

Изборот на Шехбаз дојде по успешното гласање за недоверба на поранешниот премиер Имран Кан во неделата.

Неговиот противкандидат, поранешниот министер за надворешни работи Шах Махмуд Куреши, кој беше кандидат на пакистанската партија Техрик-е-Инсаф (ПТИ) на соборениот премиер, ги бојкотираше изборите по одлуката на неговата партија да поднесе оставка од Парламентот.

Во обраќањето пред да ги бојкотира изборите, Куреши рече: „Не можеме да бидеме дел од оваа фарса откако ќе докажеме дека целата оваа вежба е резултат на меѓународен заговор.“

Соборениот премиер Кан заедно со над 120 пратеници на ПТИ објавија дека поднесуваат оставки од Парламентот и „излегуваат на улица против увезената влада“.

Оставките, сепак, нема да важат додека претседателот на Националното собрание не ги прифати, според Уставот на земјата.

Кан ги обвинува САД за соборување на неговата влада поради неговата „независна надворешна политика“.

- 23-ти премиер на Пакистан-

Веднаш штом вршителот на должноста претседател, Ајаз Садик, ги објави резултатите, пратениците тропаа на бироата и извикуваа слогани во корист на новоизбраниот премиер, поранешниот претседател Асиф Зардари и поранешниот премиер Наваз Шариф, кој моментално се наоѓа во Лондон.

Шехбаз (70) беше клучен во напорите на опозицијата да ја собори Владата на Кан.

Тој вечерва ќе положи заклетва како 23-ти премиер на Пакистан. Претседателот Ариф Алви ќе даде заклетва во Претседателскиот дом во главниот град Исламабад.

Шехбаз претходно беше главен министер на клучната провинција Пенџаб, каде што разви репутација како ефикасен администратор.

Новиот премиер ќе ја извршува преостанатата една и пол година мандат, а поверојатна е можноста за предвремени избори.

Тој за ден-два се очекува да го објави својот Кабинет.

Шехбаз повика на подобрување на врските со САД, нарекувајќи ги „критични“ за Пакистан, што е забележливо отстапување од замрзнатите односи на Кан со Вашингтон што тој го обвини дека го организирал неговото соборување.

Кан, од своја страна, најави дека нема да ја прифати „увезената влада“, повикувајќи ги своите приврзаници да протестираат против новиот режим.

Десетици илјади негови приврзаници излегоа на улиците синоќа низ целата земја за да протестираат против соборувањето на Кан, нарекувајќи го соборувањето „странски заговор“.