Турската светска рекордерка Ерџумен нурка за Газа под мотото „Нека темнината се претвори во светлина“

АНТАЛИЈА (АА) – Турската светска рекордерка во слободно нуркање и амбасадорка на Обединетите нации за кампањата „Живот под вода“, Шахика Ерџумен, се подготвува за нов обид за светски рекорд под мотото „Нека дише Газа, нека темнината се претвори во светлина“, по постигнатиот прекин на огнот во Газа, јавува Анадолу.

Ерџумен планира да нурне на 107 метри длабочина во категоријата варијабилна тежина без перки, надминувајќи го сопствениот рекорд од 106 метри.

Нуркањето ќе се одржи во Каш, Анталија, во чест на 102-годишнината од основањето на Турската Република и како симболична поддршка за народот на Газа.

„Сакам да нурнам за да може Газа да дише“, изјави Ерџумен за Анадолу.

„Знам како е да го задржиш здивот под вода неколку минути – тоа што народот во Газа го трпи со години е постојана неправда“, вели таа.

Нуркањето, кое ќе трае околу три и пол минути, ќе се изведе под надзор на меѓународни судии и ќе биде пренесувано во живо од подводна камера.

Ерџумен го спореди предизвикот со „спуштање до дното на зграда со 40 ката“, каде што ќе биде изложена на притисок поголем од 11 атмосфери.

Минатата недела американскиот претседател Доналд Трамп објави дека Израел и Хамас се согласиле за првата фаза од планот што го предложи на 29 септември за воведување прекин на огнот во Газа, ослободување на сите израелски заложници во замена за палестинските затвореници и постепено повлекување на израелските сили од целиот Појас Газа. Првата фаза од договорот стапи на сила во петокот.

Втората фаза од планот предвидува воспоставување нов управувачки механизам во Газа без учество на Хамас, формирање безбедносни сили составени од Палестинци и војници од арапските и исламските земји и разоружување на Хамас.

Од октомври 2023 година во израелските напади врз Појасот Газа убиени се повеќе од 67.600 Палестинци, повеќето од нив жени и деца.