Германско деловно здружение: Односите меѓу Турција и Германија се одразуваат во инвестициите и иновациите

Феликс Нојгарт, извршен директор на германската агенција за трговија и инвестиции НРВ.Глобал Бизнис, истакнувајќи дека постои силен човечки мост меѓу Турција и Германија, денес изјави дека во Германија живеат повеќе од еден милион лица со турско потекло и дека оваа поврзаност се одразува во инвестициите, производството и иновациите, јавува Анадолу.

Говорејќи на деловниот форум Турција-Северна Рајна-Вестфалија во Истанбул, организиран од Советот за надворешноекономски односи на Турција (ДЕИК) и НРВ.Глобал Бизнис, Нојгарт рече: „Не постои регион во Европа, би рекол вака – не постои регион во светот што има поблиски врски со Турција од Северна Рајна-Вестфалија.“

Тој рече дека односите не се темелат само врз трговијата, туку и врз компании што заеднички инвестираат, произведуваат, иновираат и отвораат работни места.

Нојгарт истакна дека двете страни ги поврзуваат долгогодишни индустриски синџири на вредност.

„Турција нуди динамичност, индустриски капацитет и стратегиска глобална поврзаност. Ние носиме технолошка експертиза, знаење и пристап до огромниот европски пазар, а со тоа ги обединуваме нашите предности“, истакна тој.

Турција и Германија заедно може да ја унапредат енергетската транзиција, рече тој, додавајќи дека двете земји може да развиваат и поотпорни синџири на снабдување.

„Може да ја унапредиме логистичката поврзаност и, веројатно најважно, може да ги претвориме иновациите во заеднички деловни можности, а токму за тоа сакаме да разговараме денес“, посочи тој.

Осврнувајќи се на говорите и панел-дискусиите на деловниот форум, Нојгарт изјави дека потпишувањето на неколку меморандуми за разбирање претставува важен сигнал за заедничката определба на двете земји дијалогот да го претворат во трајни партнерства и конкретни проекти.

Претседателот на ДЕИК, Наил Олпак, рече дека Северна Рајна-Вестфалија е едно од индустриските средишта на Европа и природен партнер за турскиот бизнис.

Олпак истакна дека Турција, со силната производствена база, динамичниот приватен сектор и висококонкурентните компании, е длабоко интегрирана во европските и глобалните синџири на вредност.

- Договори -

На настанот ДЕИК и НРВ.Глобал Бизнис потпишаа договор за соработка.

Компании од Турција и Германија, исто така, потпишаа осум деловни договори.