Алтун по нападот врз тимот на ТРТ во Газа: Израел ќе одговара за злосторствата

АНКАРА (АА) - Шефот на Канцеларијата за комуникации на турскиот претседател, Фахретин Алтун, го осуди израелскиот напад врз репортерската екипа на ТРТ во Газа, јавува Анадолу.

Алтун на социјалните мрежи истакна дека Израел напаѓа и новинари.

„Го осудувам нападот врз тимот на ТРТ кој беше директна цел на израелските снајперисти додека беше на должност. Во Газа повеќе нема место ниту на гробиштата. Освен геноцидните злосторства, Израел секако ќе биде одговорен за нападите и масакрите врз ТРТ и другите новинари, кои отворија 'комуникациски коридор' од Газа кон светот, му посакувам брзо закрепнување на репортерот на ТРТ, Сами Берхум, како и на целиот тим на ТРТ“, рече Алтун.

Израелската армија нападна возило со тим на ТРТ Араби во градот Кан Јунис во јужниот дел на Појасот Газа, во област за која се тврди дека е безбедна.

Сами Берхум, дописникот на ТРТ Араби Газа, рече дека на израелските војници цел им било возило во Кан Јунис, иако тоа било новинарска екипа.

„Бевме цел четврти пат од почетокот на војната, иако имавме прес-возило, шлем и елек. Отидовме да правиме вести во област северно од Кан Јунис, која Израел ја смета за безбедна, каде што раселените Палестинци се концентрирани“, рече Берхум.

Тој истакна дека во нив пукале израелски снајперисти стационирани на ридовите.

„Тие пукаа и во возилото и околу возилото. Продолжија да пукаат околу 15 минути откако се оддалечивме пет метри од возилото“, рече Берхум.

Тој истакна дека во Газа нема безбедно место.

„Израелските војници нè гаѓаат директно, без никакво предупредување. Директно ни го гаѓаа возилото, го гаѓаа ветробранското стакло на возилото и нашиот снимател“, рече Берхум.