Ердоган по локалните избори во Туркије: „Победник на изборите е нашата демократија“

АНКАРА (АА) – Претседателот на Туркије и претседател на АК Партијата, Реџеп Таип Ердоган, изјави дека без разлика на резултатите, победник на локалните избори во Туркије се демократијата и граѓанската волја, јавува Анадолу.

„Волјата на народот се манифестира на избирачките места, нацијата го изнесува својот глас на избирачките места и им пренесува порака на политичарите на гласачките места“, рече Ердоган во обраќањето пред граѓаните собрани во седиштето на АК Партијата во Анкара, по одржаните локални избори во земјата.

„Без оглед на резултатите, победник на овие избори е нашата демократија и граѓанската волја“, рече Ердоган.

Тој нагласи и дека изборите кои се одржаа на 31 март се пресвртница.

„31 март за нас не е крајот, туку всушност пресвртница. Денеска победија сите што гласаа за АК Партијата и Народната алијанса, како и сите други што го искористија своето демократско право“, додаде тој.

Нагласи дека волјата на граѓаните е најважна во демократските општества, додавајќи дека тие секогаш биле на страната на демократијата и на гласачките кутии.

„Денес постапуваме со истото чувство на одговорност и не признаваме никаква друга моќ над волјата на нацијата“, рече Ердоган, напоменувајќи дека пред Туркије се важни четири години.

„Дефинитивно ќе ги преземеме неопходните чекори со тоа што на најкоректен и најобјективен начин, врз основа на разумот и совеста, ќе ги оцениме пораките што народот ги даде на гласачките места“, рече Ердоган.

На крајот тој изрази желба резултатите од локалните избори да бидат од корист за државата и народот на Туркије.

Во Туркије денес се одржаа локални избори на кои гласачите избираа градоначалници на големите градови, градоначалници на општини и градски или обласни и општински совети. Гласачите ги избраа и најниските инстанци на локалната власт во Туркије, односно старешините или мухтарите и советите на старешините.

Нешто повеќе од 61 милион регистрирани гласачи ги бираа локалните власти за петгодишен мандат, на речиси 208.000 избирачки места.