Туркије: Израел продолжува да го крши законот со својата окупација на територии во Сирија

ИСТАНБУЛ (АА) - Турското Министерство за национална одбрана денес ги отфрли тврдењата на американскиот Стејт департмент за наводен договор за прекин на огнот со терористичката организација ПКК/ЈПГ, која дејствува под називот СДФ, јавува Анадолу.

„Ние не преговараме со терористички организации, веруваме дека ова е лапсус“, рече портпаролот на Министерството, Зеки Актурк, отфрлајќи ги сите тврдења за преговори со такви организации.

На неделниот брифинг за новинарите во Министерството, Актурк даде силни изјави за неколку клучни меѓународни и безбедносни прашања.

„Остро ја осудуваме одлуката на Израел за проширување на нелегалните населби на Голанската Висорамнина, која ја окупира од 1967 година“, рече Актурк.

Министерството, исто така, изрази загриженост поради континуираните акции на Израел во Сирија.

„Израел сега продолжува со својата незаконитост во Сирија и со својата окупација на територии. Неопходно е да се прогласи прекин на огнот и да се обезбеди регионална стабилност колку што е можно поскоро“, истакна Актурк, нагласувајќи ја потребата за итен мир во регионот.

Освен тоа, тој ја потврди посветеноста на Туркије на борбата против тероризмот.

„Нагласуваме дека ќе продолжиме да преземаме превентивни и деструктивни мерки против терористичките организации и да соработуваме со новата администрација во Сирија во борбата против тероризмот“, рече портпаролот на турското Министерство за одбрана, сигнализирајќи на континуирана соработка со сириското раководство по Асад.

Тој ги истакна и антитерористичките дејства на Туркије, особено против ПКК/ЈПГ.

„Нашите подготовки и мерки во борбата против тероризмот ќе продолжат сѐ додека терористичката организација ПКК/ЈПГ не го остави оружјето, а странските борци во неа не ја напуштат Сирија“, додаде Актурк.

Тој ја изрази довербата на Анкара во новата влада и војска на Сирија, наведувајќи: „Веруваме дека новата администрација во Сирија и нејзината армија, Сириската национална армија, заедно со сирискиот народ, ќе ги ослободат регионите окупирани од терористичката организација ПКК/ЈПГ.“