Турскиот министер Фидан: Ќе продолжиме да стоиме цврсто против угнетувањето

АНКАРА (АА) – Турскиот министер за надворешни работи, Хакан Фидан, вети дека Турција ќе го застапува гласот на муслиманскиот свет и ќе се залага за глобална правда, и ја осуди регионалната агресија на Израел на самитот на Организацијата за исламска соработка (ОИС), јавува Анадолу.

Турција, за време на претседателствувањето со ОИС, „ќе го засили гласот на муслиманскиот свет, ќе даде приоритет на воспоставувањето глобална правда и ќе продолжи цврсто да се спротивставува на угнетувањето“, изјави Фидан на 51-та сесија на Советот на министри за надворешни работи на ОИС во Истанбул.

Во време кога нападите на Израел врз Газа и Иран продолжуваат, Истанбул повторно е домаќин на многу значаен настан, привлекувајќи глобално внимание кон Турција.

Турција е домаќин на 51-та сесија на темата „ОИС во светот што се трансформира“. Се очекува сесијата да биде една од најпосетените состаноци во историјата на ОИС.

„Израел сега го напаѓа нашиот сосед Иран, туркајќи го регионот на работ на целосна катастрофа“, истакна Фидан.

Прашањето за тековната агресија на Израел „не е проблем ниту на Палестина, ниту на Либан, ниту на Сирија, ниту на Јемен, ниту на Иран. Ова прашање е јасно проблем на Израел“, додаде тој.

Непријателствата избувнаа на 13 јуни кога Израел започна воздушни напади врз неколку локации низ Иран, меѓу кои и воени и нуклеарни објекти, што го натера Техеран да започне одмазднички напади.

Израелските власти соопштија дека најмалку 25 лица се загинати, а стотици се повредени во иранските ракетни напади оттогаш.

Во Иран, 430 лица се убиени, а над 3.500 се ранети во израелските напади, според извештаите на иранското Министерство за здравство.