Nihat Kavşut
27 Cotmeh 2020•Rojanekirin: 28 Cotmeh 2020
Serokomarê Tirkiyeyê Recep Tayyîp Erdogan ji ber sûcê "heqaretkirina li serokomar" der barê Geert Wîldersê Serokê Partiya Azadiyê da ku li Hollandayê partiyeke rastgira radîkal e, gilîdar bû.
Huseyîn Aydinê parêzerê Erdogan di gilîdarbûna li Serdozgeriya Komarê ya Enqereyê da destnîşan kir Wîldersê bi gotinên xwe Erdogan dike hedef sûcê heqaretê kiriye.
Di daxwaznameyê da hat destnîşankirin ji ber ku sûcê navborî dijî serokomar e ji ber qanûna eleqedar qanûnên Tirkiyeyê derbas dibin.
Di daxwaznameyê da hat diyarkirin li gor benda 104emîn ya Destûra Bingehîn serokomar bi sifeta serokê dewletê Komara Tirkiyeyê û yekîtiya gelê Tirk temsîl dike û wiha hat gotin: "Ji ber vê rewşa îstisnaî ya serokomar şexsiyeta wî û sifet û wezîfeya wî bi hev ra tên fehmkirin. Loma jî her çiqas dijî meqamê nebe dijî şexsê wî be jî divê heqareta dijî serokomar wekî sûcên dijî şexsan neyê dîtin."
Di daxwaznameyê da wiha hat gotin: "Şikbar Wîlders serokomarê me yê ku cara ewil hatiye hilbijartin ji xwe ra kiriye hedef, bi nivîsa xwe gotinên ku rûmet, şeref û xîreta birêz serokomarê me rencîde dikin êrîşî îtibar, rûmet û şexsiyeta wî kiriye û sûcê navborî bi eşkereyî kiriye. Sûcê navborî li ser malpereke medyaya civakî belav bûye û eşkere bûye. Ji ber vê jî ji ber sûcê navborî lêpirsîn bê kirin û der barê wî da doza kamuyê bê vekirin."
