ئەردۆغان: "دیاربەکر بووەتە ئیستانبوڵی باشووری رۆژھەڵاتی تورکیا"

ئیستانبوڵ - AA

سەرکۆماری تورکیا، رەجەب تەیب ئەردۆغان گوتی: "ئیتر دیاربەکر بووەتە ئیستانبوڵی رۆژھەڵات و باشووری رۆژھەڵاتی تورکیا. ئەگەر ئەمە لە دەستی ئەوان با، روویدەدا؟ بەتایبەتی برایانی رۆژھەڵات و باشووری رۆژھەڵات ئاگایان لەم وردەکارییە نییە. من داوای پشتیوانیان لێ دەکەم، داوای ھاوکاریان لێ دەکەم، با دەست لە ناو دەست کۆتایی بەم کارە بھێنین".
سەرکۆماری تورکیا، رەجەب تەیب ئەردۆغان لە پرۆگرامێکی بەربانگ کردنەوە لە شاری ئیستانبول وتارێکی پێشکەش کرد کە لەلایەن سەکۆی ئیرادەی سڤیلی رۆژھەڵات و باشووری رۆژھەڵاتی تورکیا رێکخرابوو.

ئەردۆغان لەبارەی ئۆپەراسیۆنەکانی تورکیا گوتی: "ئێمە بە ئەنجامدانی ئۆپەراسیۆنەکان بۆ سەر رێکخراوی جوداخواز، داھاتووی تورکیامان رزگار کرد. تیرۆریستان رووخاندیان ئێمە دووبارە بونیاتمان ناوە".

ئەردۆغان گوتیشی: "لە بەردەممان گەشتێکی درێژی دیموکراسی و گەشەپێدان ھەیە. ئێمە وەکو کەسانێک خاوەنی بیرە نەوت و گاز نین، بەڵام ئێمە لەوان دەوڵەمەنتر و ئازادترین. چونکە ئێمە خاوەنی بەھێزترین چەکی وەک دیموکراسی، ھەڵبژاردنی ئازاد، ئیرادەی نەتەوەیین. ھەر کاتێک بکەوینە تەنگانە، ھەڵبژاردنی ئازاد بەکاردەھێنین".

سەرکۆماری تورکیا، رەجەب تەیب ئەردۆغان راشیگەیاند: "تا لەناوبردنی کۆتا تیرۆریست لە وڵاتەکەمان ئەم بەرەنگارییە بەردەوام دەبێت".

ئەردۆغان زیاتر گوتیشی: "ئایا یاسین بۆرو کورد نەبوو؟ یاسین بۆرۆ تەمەنی چەند ساڵ بوو؟ تەنھا ١٥-١٦ ساڵ بوو. یاسین بۆرو چی دەکرد؟ کەلوپەلی بەسەر ھەژاران دابەش دەکرد. ئایا ئەویان بە بێ ویژدانانە نەکوشت؟ کێ بوون ئەوانەی کوشتیان؟ تیرۆریستان بوون".

سەرکۆماری تورکیا، رەجەب تەیب ئەردۆغان باسی لە شاری دیاربەکر کرد و گوتی: "ئیتر دیاربەکر بووەتە ئیستانبوڵی رۆژھەڵات و باشووری رۆژھەڵاتی تورکیا. ئەگەر ئەمە لە دەستی ئەوان با، روویدەدا؟ بەتایبەتی برایانی رۆژھەڵات و باشووری رۆژھەڵات ئاگایان لەم وردەکارییە نییە. من داوای پشتیوانیان لێ دەکەم، داوای ھاوکاریان لێ دەکەم، با دەست لە ناو دەست کۆتایی بەم کارە بھێنین".

ئەردۆغان لەبارەی بڕیاری داخستنی ژمارەیەک مزگەوت لەلایەن نەمساوە گوتیشی: "بە تایبەتی پێویستە جیھانی رۆژئاوا، ئەم جۆرە پیاوانەی بھێنێتەوە سەر رێگای راست. ئەگەرنا بە پێچەوانەوە کارەکە بەرەو ئاراستەی دیکە دەڕوات. باس لە دەرکردنی پیاوانی ئاینی ئێمە بۆ دەرەوەی نەمسا دەکەن، ئەگەر ئێوە وا بکەن ئایا ئێمە دەستەوەستان دەبین؟ ئێمەش ھەڵبەتە شتێک دەکەین ".