تەقینەوەیەک لە نزیک فڕۆکەخانەی حامید کارزای روویدا

کابوڵ- AA

لە کابوڵ پایتەختی ئەفغانستان و لەو ناوچەیەی کە فڕۆکەخانەی حامید کارزای لێیە، تەقینەوەیەک روویدا.

پەیامنێری ئانادۆڵو ئەوەی ئاشکرا کرد کە لە نزیک فڕۆکەخانەکە دەنگی تەقینەوەیەک بیستراوە.

گوتەبێژی وەزارەتی بەرگریی ئەمریکا، جۆن کێربی دەربارەی ئەم رووداوە روونکردنەوەی دا و رایگەیاند: "ئەوە پشتڕاست دەکەینەوە کە لە دەرەوەی فڕۆکەخانەی حامید کارزای تەقینەوەیەک روویداوە".

جۆن کێربی باسی لەوەش کرد کە تا ئێستا هیچ زانیارییەکیان لە بارەی زیانەکانی تەقینەوەکەوە لەبەردەستدا نییە و هەرکات زانیاری نوێیان بەدەست گەیشت، بۆ رای گشتی ئاشکرای دەکەن.

لە لایەکی دیکەشەوە کەناڵی جەزیرە لە هەواڵێکدا ئەوەی خستوەتەڕوو کە ژمارەی کوژراوەکان بۆ ٢٥ کەس و ژمارەی بریندارەکانیش بۆ ٩٠ کەس بەرزبووەتەوە.

لای خۆشیەوە گوتەبێژی تاڵیبان، زەبیحوڵڵا موجاهید لە روونکردنەوەیەکدا کە لە هەژماری تایبەتی خۆی لە تۆڕی کۆمەڵایەتی تویتەر بڵاویکردووەتەوە، بەتوندیی ئیدانەی تەقینەوەکانی کردووە و باسی لەوەش کردووە کە رووداوەکە لەو شوێنەدا بووە کە هێزەکانی ئەمریکا بەرپرسن لە ئاسایشی.