راگەیەندراوی کۆتایی لووتکەی سێقۆڵی نێوان عێراق، ئوردن و میسر
راگەیەنراوی کۆتایی لووتکەی سێقۆڵی نێوان عێراق، ئوردن و میسر لە بەغدا: "ستایشی ھەوڵەکانی حکوومەتی عێراق کراوە کە بە ئامانجی ئەنجامدانی هەڵبژاردنی پێشوەختە، چاکسازیی ئابووریی و بەرەنگاربوونەوەی تیرۆر، خستوویەتەگەڕ".
ھەولێر ــ AA
لە میانی لووتکەی سێقوڵی نێوان عێراق، ئوردن و میسر کە لە بەغدا بەڕێوەچوو، ستایشی ھەوڵەکانی حکوومەتی عێراق کراوە کە بە ئامانجی ئەنجامدانی هەڵبژاردنی پێشوەختە، چاکسازیی ئابووریی و بەرەنگاربوونەوەی تیرۆر، خستوویەتەگەڕ.
نووسینگەی راگەیاندنی سەرۆکوەزیرانی عێراق راگەیەنراوی کۆتایی لووتکەی سێقوڵی نێوان عێراق، ئوردن و میسر کە ئەمڕۆ یەکشەممە لە بەغدا بەڕێوەچوو بڵاوکردەوە و تیایدا ئاماژە بەوەدراوە کە ئەمڕۆ لووتکەی سێقۆڵی لە نێوان سەرۆکوەزیرانی عێراق، مستەفا کازمی و شای ئوردن، عەبدوڵڵای دووەم و سەرکۆماری میسر، عەبدولفەتاح سیسی لە بەغدا بە ئامانجی چۆنیەتی پتەوترکردنی ھاریکاریی و ھەماھەنگیی نێوان ھەر سێ وڵات بەڕێوەچووو ھاتووە:
"بەستنی لووتەکەی سێقۆڵیی تەواوکاریی ھەوڵەکانی سەرکردەکانی عێراق، ئوردن و میسرە بۆ پتەوترکردنی ھەوڵە ھاوبەشەکانی نێوان ھەر سێ وڵات لە سەرجەم بوارەکاندا، ئەوەیش کە لە لووتکەکانی رابردوودا، لەسەری رێککەوتوون کە دوایین لووتکەیش لە عەممان پایتەختی ئوردن لە ٢٥ی مانگی ئابی ٢٠٢٠دا بەسترابوو".
بەپێی راگەیەنراوەکە شای ئوردن، عەبدوڵڵای دووەم و سەرکۆماری میسر، عەبدولفەتاح سیسی لە میانی لووتکە سێقوڵییەکەدا لە بەغدا ستایشی ھەوڵە دیپلۆماتییەکانی حکوومەتی عێراقیان کردووە کە بۆ پاڵپشتیکردن لە ئاسایش و سەقامگیری ھەرێمیی بە ئامانجی چارەسەرکردنی ناکۆکییەکان و کۆتایی ھێنان بە قەیرانەکان لە ناوچەکە خستوویەتەگەڕ و ھاتووە:
"ھەر لە میانی لووتکەدا، سەرکردەکانی ئوردن و میسر ستایشی ھەوڵەکانی حکوومەتی عێراقییان کردووە لە شەڕی دژبە تیرۆر و بەرپەرچدانەوەی رێکخراوی تیرۆریستی داعش کە بووەتە مایەی دوورخستنەوەی مەترسییەکان لەسەر ئاسایشی عێراق و پاڵپشتیکردن لە سەقامگیری ناوچەکە".
باس لەوەشکراوە کە ھەر لە میانی لووتکەدا، سەرکردەکانی ئوردن و میسر رایانگەیاندووە کە ستایشی ھەنگاوەکانی حکوومەتی عێراق دەکەن بۆ ئەنجامدانی چاکسازی ئابووریی کە کاریگەریی لەسەر چارەسەرکردنی قەیرانی دارایی و گەشەپێدانی ئابووریی لە عێراق ھەبووە و ھاتووە:
"ھەر لە میانی لووتکەکەدا، شای ئوردن، عەبدوڵڵای دووەم و سەرکۆماری میسر، عەبدولفەتاح سیسی پاڵپشتی خۆیان بۆ ئامادەکارییەکانی حکوومەتی عێراق بە ئامانجی ئەنجامدانی ھەڵبژاردنی داھاتووی ئەنجوومەنی نوێنەرانی عێراق راگەیاندووە کە چاوەڕوان دەکرێت لە ١٠ی مانگی تشرینی یەکەمی داھاتوو بەڕێوەبچێت".
لە راگەیەنراوەکەدا ھەروەھا ھاتووە:"لە میانی لووتکەکەدا، عەبدوڵڵای دووەم و عەبدولفەتاح سیسی جەختیانکردووەتەوە لەسەر ئەوەی کە پاڵپشتی لە ھەوڵەکانی حکوومەتی عێراق بە ئامانجی پتەوترکردنی ئاسایشی عێراق و سەپاندنی سەروەریی نیشتمانیی ھەروەھا رێگرتن لە دەستوەردان لە کاوباری ناوخۆی عێراق".
ئاماژە بەوەیشدراوە کە لە بەشێکی دیکەی لووتکە سێقۆڵییەکەدا لە بەغدا، سەرکردەکانی عێراق و ئوردن، پاڵپشتییان خۆیان بۆ ھەڵوێستی میسر لە دۆسیەی بەنداوی نەھزە راگەیاندووە و جەختیانکردووەتەوە لەوەی پێویستە ھیچ رێوشوێنێکی تاکە لایەنە لەبارەی بەنداوی نەھزە نەگیرێتەبەر.
بەپێی راگەیەنراوەکە لە میانی لووتکەکەدا، جەختکراوەتەوە لەسەر ئەوەی کە پێویستە ھەوڵی زیاتر بدرێت ئامانجی بەدیھێنانی ئاشتییەکی دادپەروەریی و گشتگیر کە تیایدا مافی رەوای گەلی فەڵەستین دەستەبەر بکرێت و لەوانە دامەزراندنی دەوڵەتی سەربەخۆ لەسەر ھێڵەکانی چواری حوەزیرانی ١٩٦٧ کە پایتەختەکەی قودسی رۆژھەلات ھەبێت بەپێی یاسا و بڕیارەکانی نێودەوڵەتیی و ھاتووە:
"سەرکردەکانی عێراق، ئوردن و میسر جەخیتانکردووەتەوە لەسەر ئەوەی کە پێویستە لەسەر بنەمای بڕیارەکانی نێودەوڵەتیی، مڵملانێیەکان چارەسەر بکرێت، چونکە ئەوە تاکە رێگایە بۆ بەدیھێنانی ئاشتییەکی دادپەروەریی و گشتگیر لە ناوچەکەدا، ھەروەھا جەختیانکردووەتەوە لەسەر ئەوەی پێویستە ئیسرائیل سەرجەم رێوشوێنەکانی کە دەبنە مایەی لەناوبردنی دەرفەتی ئاشتیی رابگرێت لەوانە گۆڕینی رەوشی مێژویی و یاسایی لە قودس و پیرۆزەکانی ئیسلام و مەسیحیی".
ھەر لە راگەیەنراوەکەدا ئەوە خراوەتەڕوو کە لە میانی لووتکەکەدا سەرکردەکانی عێراق و ئوردن ستایشی رۆڵی میسریان کردووە بۆ کۆتاییھێنان بە گرژییەکانی ئەم دواییە لە غەززە و راگرتنی ھێرشەکانی ئیسرائیل لە غەززە لەوبارەیەوە رایانگەیاندووە کە ھەوڵەکانی میسر بۆ ئاگربەست و ھێورکردنەوەی رەوشی کەرتی غەززە بەرز دەنرخێنن و ھەروەھا خۆشحاڵی خۆیان نیشانداوە سەبارەت بەو دەستپێشخەرییەی کە میسر بۆ دووبارە ئاوەدانکردنەوەی غەززە راگەیاندووە و ھاتووە:
"ھەروەھا سەرکردەکانی عێراق و میسر، ستایشی ھەوڵەکانی ئوردنیان کردووە بۆ راگرتنی پێشێلکاریی و دەستدرێژییەکانی ئیسرائیل لە شاری قودس و شارەکانی دیکەی فەڵەستین".
باس لەوەشکراوە کە لە میانی لووتکە سێقوڵییەکەی نێوان عێراق، ئوردن و میسر لە بەغدا پێشھاتەکانی ھەرێمیی و نێودەوڵەتیی و ھەروەھا گەیشتن بە چارەسەری سیاسی بۆ قەیرانەکان لە ناوچەکە خراونەتە بەرباس بە تایبەتیش رەوشی سووریا و لەوبارەیەوە سەرکردەکانی عێراق، ئوردن و میسر ھاوڕابوون لەسەر گەیشتن بە چارەسەری سیاسی بۆ قەیرانی سووریا ئەوەیش پشتن بەستن بە بڕیاری ئەنجوومەنی ئاسایشی نێودەوڵەتیی ژمارە (٢٢٤٥) کە تیایدا ئاسایش و سەقامگیری سووریا بپارێزێت بۆ ئەوەی سەرجەم پەنابەرانی سووریا بتوانن بگەڕێنەوە زێدی خۆیان.
لە بەشێکی دیکەی راگەیەنراوەکەدا ھاتووە:"لە میانی لووتکە سێقۆڵییەکەدا، سەرکردەکانی عێراق، ئوردن و میسر خۆشحاڵی خۆیان نیشانداوە سەبارەت بە پێکھێنانی حکوومەتی نوێی کاتی لیبیا و پاڵپشتی خۆشیان بۆ ئەنجامدانی ھەڵبژاردنەکان لە لیبیا راگەیاندووە کە چاوەڕوان دەکرێت لە ٢٤ی کانوونی یەکەمی داھاتوو ئەنجام بدرێت.
ئەوەیش خراوەتەڕوو کە لە میانی لووتکەکەدا، باس لە ھەوڵەکان بۆ گەیشتن بە چارەسەری سیاسی تایبەت بە قەیرانی یەمەن کراوە و ھاتووە:
"سەرکردەکانی عێراق، ئوردن و میسر جەختیاکردووەتەوە لەسەر ئەوەی کە پاڵپشتی لە ھەوڵەکانی نەتەوە یەکگرتووەکان دەکەن بۆ گەیشتن بە چارەسەری سیاسی بۆ قەیرانی یەمەن بۆ ئەوەی ئاسایش و سەقامگیری لەو وڵاتە بەدی بێت".
ئاماژە بەوەیشدراوە کە سەرکردەکانی عێراق، ئوردن و میسر لە میانی لووتکەکەدا، جەختیانکردووەتەوە لەسەر پابەندبوون بە بنەمای باشی دراوسیەتیی و دەستوەرنەدان لە کاروباری وڵاتان و ھەوڵدان بۆ بەدیھێنانی بەرژەوەندی ھاوبەش و ھاتووە:
"ھەر لە میانی لووتکەکەدا، جەختکراوەتەوە لەسەر گرنگی بەردەوامیدان بە ھەماھەنگیی و ھاریکاریی ھاوبەشی نێوان ھەر سێ وڵات بە ئامانجی بەدیھێنانی بەرژەوەندی ھاوبەش و پتەوترکردنی کاری ھاوبەش بۆ پاراستنی ئاسایش و سەقامگیری لە ناوچەکە".
لە راگەیەنراوەکەدا ئاماژە بەوەدراوە کە سەرکردەکانی عێراق، ئوردن و میسر ھەر لە میانی لووتکەکەدا تیشکیان خستووەتە سەر ئەوەی کە گرنگە پەیوەندییەکانی نێوان ھەر سێ وڵات پتەوتر بکرێن لە بواری ئابووریی و ھەوڵەکانیان چڕ بکەنەوە بە ئامانجی زیادکردنی ئاڵوگۆڕی بازرگانیی نێوان عێراق، ئوردن و میسر لەگەڵ پتەوترکردنی ھەوڵەکان لە بوارەکانی تەندروستیی، پیشەسازیی و دەرمان بە تایبەتیش کە ئێستا لێکەوتەکانی پەتای کۆرۆنای نوێ کاریگەریی لە تەندروستیی و ئابووریی جیھان دروستکردووە و ھاتووە:
"ھەروەھا سەرکردەکانی عێراق، ئوردن و میسر لە میانی لووتکەکەدا، جەختیانکردووەتەوە لەسەر گرنگی ھەماھەنگیی نێوان ھەر سێ وڵات لە بوارەکانی ئاسایش، ھەواڵگریی بە ئامانجی بەرەنگاربوونەوەی تیرۆر".
بەپێی راگەیەنراوەکە ھەر لە میانی لووتکەکەدا، جەختکراوەتەوە لەسەر گرنگی گرتنەبەری رێوشوێنەکان بۆ دەستکردن بە جێبەجێکردنی پڕۆژەی شاری ئابووریی ھاوبەشی نێوان عێراق و ئوردن و لەوبارەیەوە بە گرنگ زانراوە کە جێبەجێکردنی پڕۆژەکە بدرێت بە کۆمپانیاکانی ھەر سێ وڵات و ھاتووە:
"سەرکردەکانی عێراق، ئوردن و میسر لە میانی لووتکەکەدا، رێککەوتن لەسەر جێبەجێکردنی پڕۆژەی بەستنەوەی ھێڵی کارەبا لە نێوان ھەر سێ وڵات لەگەڵ بەستنەوەی تۆڕەکانی گواستنەوەی غاز لە نێوان عێراق، میسر و ئوردن و لەگەڵ دروستکردنی ھێڵی گواستنەوەی نەوتی خام (بەسرە ــ عەقەبە) لەگەڵ رەخساندنی دەرفەتی وەبەرھێنان بۆ پاڵپشتیکردن لە کۆمپانیانی کەرتی تایبەت بۆ ئەوەی پڕۆژەکانی وەبەرھێنان لەھەر سێ وڵات جێبەجێ بکرێن".
ئەوەیش خراوەتەڕوو کە لە میانی لووتکەکەدا، جەختکراوەتەوە لەسەر ئەوەی پێویستە ھەر سێ وڵات لە سەرجەم بوارەکاندا و کەرتەکانی پیشەسازیی زیاتر ھاریکاریی یەکتر بکەن و ھاوڕابوون لەسەر ئەوەیش کە گرنگە ئاستەنگەکانی بەردەم ئاڵوگۆڕی بازرگانیی نێوان عێراق، ئوردن و میسر لا ببرێن و پێکەوە ھەوڵەکانیان چڕ بکەنەوە بە ئامانجی دامەزراندنی بازرگانیی ئەلیکترۆنیی و ھاتووە:
"سەرکردەکانی ھەر سێ وڵات ھاوڕابوون لەسەر ئەوەی کە گرنگە ھاریکارییەکانی نێوان عێراق، ئوردن و میسر لە بوارەکانی کشتوکاڵیی، ئاسایشی خۆراکیی لە میانی تەواوکردنی پڕۆژەی دامەزراندنی کۆمپانییەکی ھەرێمیی بۆ بەبازاڕکردنی بەرووبوومە کشتوکاڵییەکان زیاتر بکرێن".
بەپێی راگەیەنراوەکە ھەر لە میانی لووتکەکەدا، سەرکردەکانی عێراق، ئوردن و میسر بە گرنگیان زانیوە زیاتر ھانی وەبەرھێنان بدرێت لە کەرتەکانی نیشتەجێبوون، رێگاوبان و پڕۆژەکانی ژێرخان و لەگەڵ ئاسانکاریی کردن بۆ خاوەن کار، وبەرھێنەران و کۆمپانیاکانی بەلێندەر بۆ کاری بنیاتنان لە نێوان ھەر سێ وڵاتدا.
باس لەوەشکراوە کە لە میانی لووتکەکەدا لە سایەی بڵابوونەوەی ڤایرۆسی کۆرۆنای نوێ، جەختکراوەتەوە لەسەر ئەوەی کە گرنگە ھەوڵە ھاوبەشەکانی نێوان ھەر سێ وڵات بەردەوامبن بۆ دووبارە کاراکردنەوەی جموجۆڵی گواستنەوەی کەلوپەلی بازرگانیی لە دەروازە سنوورییەکانی بەندەری عەقەبە لە ئوردن و و تریبێل لە عێراق و ھاتووە:
"سەرکردەکانی عێراق، ئوردن و میسر لە میانی لووتکەکەدا لەچوارچێوەی ھەوڵەکانیان بۆ پتەوترکردنی ئاستی ھاریکاریی ئابووریی نێوان ھەر سێ وڵات داوایانکردووە دیداری کار لە کۆبوونەوەی داھاتووی وەزیرانی پیشەسازی و بارزگانیی نێوان عێراق، ئوردن و میسر ببەسترێت کە بڕیاربوو ساڵی رابردوو ئەنجام بدرایە، بەڵام بەھۆی بڵاوبوونەوەی ڤایرۆسی کۆرۆنا، ئەنجام نەدرا".
بەپێی راگەیەنراوەکە سەرکردەکانی عێراق، میسر و ئوردن ھەر لە میانی لووتکەکەدا رێککەوتن لەسەر ئەوەی کە لە بواری گواستنەوەی گەشتیارانی نێوان ھەر سێ وڵاتدا، زیاتر ھاریکاریی یەکتر بکەن و ھاتووە:
"ھاوکات لەگەڵ بڕیاری سەرکردەکان لە لووتکەی عەممان لە ٢٠٢٠ لەبارەی دەستاودەستکردنی سکرتاریەتیی جێبەجێکردنی میکانیزمی ھاریکاریی سێقۆڵی، لە لووتکەکەی ئەمڕۆدا، بڕیاردرا لە مانگی ئابی داھاتوودا بۆ ماوەی یەک ساڵ، ئەرکی سکرتاریەتەکە لە لایەن وەزارەتی دەرەوەی ئوردنەوە رادەستی وەزارەتی دەرەوەی عێراق بکرێت".
ئەمڕۆ یەکشەممە بە ئامادەبوونی ھەریەک لە سەرۆکوەزیرانی عێراق، مستەفا کازمی و شای ئوردن، عەبدوڵڵای دووەم و سەرکۆماری میسر، عەبدولفەتاح سیسی لووتکەی سێقۆڵی لە بەغدا دەستی پێ کرد.
