روونكردنه‌وه‌ی پنتاگۆن سه‌باره‌ت به‌ ره‌ققە

واشنتۆن - AA
وه‌زاره‌تی به‌رگری ئه‌مریكا (پنتاگۆن)، ئاماژه‌ی به‌وه‌ كرد كه‌ هێزه‌كانی وشكانیی ئه‌مریكا به‌شداری ناكه‌ن له‌ ئۆپه‌راسیۆنه‌كانی كۆنترۆڵكردنه‌وه‌ی شاری ره‌ققە باکووری سووریا له‌ده‌ست رێكخراوی تیرۆریستیی داعش، به‌ڵكو كاری سه‌ربازانیان راوێژكاری و پێشكه‌شكردنی هاوكاری ده‌بێت.
گوته‌بێژی پنتاگۆن، پیته‌ر كووك له‌ كۆنگره‌یه‌كی رۆژنامه‌وانیدا وه‌ڵامی پرسیاری رۆژنامه‌نووسانی دایه‌وه‌ سه‌باره‌ت به‌ ئۆپه‌راسیۆنه‌كانی دژبه‌ داعش.
له‌ وه‌ڵامی پرسیارێكدا سه‌باره‌ت به‌ هه‌وڵه‌كانی كۆنترۆڵكردنه‌وه‌ی شاری ره‌ققە باکووری سووریا كه‌ ئێستا له‌ژێر ده‌ستی رێكخراوی تیرۆریستی داعشدایه‌، كووك باسی له‌وه‌ كرد له‌و ئۆپه‌راسیۆنه‌ی له‌ رۆژی شه‌ممه‌وه‌ ده‌ستی پێكردووه‌ هێزه‌كانی سووریای دیموكرات پێشڕه‌ویان كردووه‌، هاوپه‌یمانی نێوده‌وڵه‌تیش به‌ڕابه‌رایه‌تی ئه‌مریكا، به‌ زنجیره‌ك هێرشی ئاسمانی پشتیوانی له‌ هێزه‌كانی سووریای دیموكرات كردووه‌ و، چه‌ندین ئۆتۆمبێلی بۆمبڕێژكرا و سه‌كۆی جه‌نگییان له‌ناوبراون.
هه‌ر سه‌باره‌ت به‌ ره‌ققە، كووك باسی له‌وه‌ كرد كه‌ به‌رده‌وام ده‌بن له‌سه‌ر پشتیوانیكردنی ئه‌و هێزانه‌ی له‌ وشكانی دژبه‌ داعش ده‌جه‌نگن و، له‌ نزیكه‌وه‌ كاركردن له‌گه‌ڵ وڵاتانی ئه‌ندامی هاوپه‌یمانیه‌كه‌. جه‌ختیشی له‌سه‌ر ئه‌وه‌ كرده‌وه‌ كه‌ سه‌بازانی ئه‌مریكی به‌شداری له‌ ئۆپه‌راسیۆنی رزگاركردنی ره‌ققەدا ناكه‌ن و، گوتی: "به‌ شێوه‌یه‌كی ورد باس له‌وه‌ ناكه‌ین كه‌ سه‌ربازانمان له‌ سووریا چیان كردووه‌، به‌رده‌وامیش ده‌بین له‌سه‌ر پێشكه‌شكردنی هاوكاری".
هاوكات له‌ وه‌ڵامی پرسیارێكدا سه‌باره‌ت به‌ ئۆپه‌راسیۆنی رزگاركردنه‌وه‌ی مووسل، كووك ئاماژه‌ی به‌وه‌ كرد كه‌ هێزه‌كانی هاوپه‌یمانی به‌رده‌وامن له‌سه‌ر پێشكه‌شكردنی هاوكاری به‌ هێزه‌ عێراقییه‌كان، له‌و چوارچێوه‌یه‌شدا بۆ یه‌كه‌مجار هێلیكۆپته‌ری ئاپاچی له‌ ئۆپه‌راسیۆنی مووسڵدا به‌كارهێنراوه‌. له‌و ئۆپه‌راسیۆنه‌شدا سه‌ربازانی ئه‌مریكی رۆڵی راوێژكاریان بینیوه‌.