عێراق و میسر ١١ یاداشتنامەی لێکتێگەیشتنیان واژوو کرد

ھەولێر- AA

سەرۆکوەزیرانی عێراق، محەمەد شیاع سوودانی رایگەیاند کە ١١ یادشتنامەی لێکتێگەیشتنیان لەگەڵ میسر واژوو کردوو کە تایبەتن بە نەخشەڕێگای پەیوەندییەکانی نێوان ھەردوو وڵات.

ئەمڕۆ سێشەممە کۆبوونەوەی لیژنەی باڵای ھاوبەشی نێوان عێراق و میسر لە قاھیرە ئەنجامدرا.

لە دوای کۆبوونەوەکە، سەرۆکوەزیرانی عێراق، محەمەد شیاع سوودانی لە کۆنگرەیەکی رۆژنامەوانی ھاوبەش لەگەڵ سەرۆکوەزیرانی میسر، مستەفا مەدبولی رایگەیاند کە لەمیانی کۆبوونەوەکەدا عێراق و میسر، ١١ یاداشتنامەی لێکتێگەیشتنیان واژوو کردووە و گوتی: "یاداشتنامە لێکتێگەیشتنەکان، تایبەتن نەخشەڕێگای پەیوەندییەکانی نێوان ھەردوو وڵات بۆ قۆناغی داھاتوو".

محەمەد شیاع سوودانی ئاماژەی بەوەیشدا کە عێراق و میسر، خواستیان ھەیە پەرەی زیاتر بە پەیوەندییەکانیان بدەن، ھەروەھا ھاریکارییەکانیان لە بوارەکانی ئابووریی، بازرگانیی، وەبەرھێنان پتەوتر بکەن و گوتی: "پێویستە ئەو یاداشتنامە لێکتێگەیشتنانەی کە واژوو کراون، جێبەجێ بکرێن".

سەرۆکوەزیرانی عێراق باسی لەوەیشکرد کە سەقامگیریی لە وڵاتەکەی بەرقەرارە و لە ئێستادا عێراق سیاسەتێکی سەربەخۆی ئابووریی لە ناوچەکەدا هەیە.

محەمەد شیاع سوودانی پاڵپشتی خۆی بۆ کەرتی تایبەت دووپاتکردەوە و رایگەیاند کە لەئێستادا، ژمارەیەکی زۆر لە وەبەرھێنەری بیانی بۆ کاری وەبەرھێنان روویان لە عێراق کردووە و گوتی: "پەرۆشی ئەوەین کۆمپانیا میسرییەکانیش بۆ وەبەرھێنان روو لە عێراق بکەن و بەرنامەیەکی باشمان بۆ ئەنجامدانی چاکسازی لە بواری ئابوورییدا داناوە".

جەختیشی کردەوە کە پێویستە عێراق و میسر رۆڵی گرنگ لە بەدیھێنانی سەقامگیریی لە ناوچەکە بگێرن و گوتی: "ئاسایش و سەقامگیریی عێراق، بەشێکە لە ئاسایش و سەقامگیریی میسر".

سەرۆکوەزیرانی عێراق، محەمەد شیاع سوودانی دووپاتیکردەوە کە گرنگە پاڵپشتی لە دەستپێشخەریی و ھەوڵەکانی میسر بکرێت بۆ چارەسەرکردنی پرسە ھەڵپەسێردراوەکان لەنێویاندا، چارەسەرکردنی پرسی فەڵەستین و گوتی: "ئەمڕۆ عێراق بووەتە بەشێک لە چارەسەرکردنی کێشە و قەیرانەکان لە ناوچەکە".

لای خۆیەوە سەرۆکوەزیرانی میسر، مستەفا مەدبولی جەختی لەسەر گرنگی پتەوترکردنی پەیوەندییەکانی نێوان میسر و عێراق کردووە و رایگەیاند کە دەیانەوێت کاری ھاوبەش لەگەڵ عێراق زیاتر بکەن.

مستەفا مەدبولی راشیگەیاند کە سەقامگیریی عێراق بۆ میسر گرنگە و گوتی: "کۆمپانیا میسرییەکان، ئامادەن بۆ کاری وەبەرھێنان روو لە عێراق بکەن".

دوێنێ دووشەممە، سەرۆکوەزیرانی عێراق، محەمەد شیاع سوودانی بەسەردانیکی فەرمی گەیشتە میسر.