گولبەددین حیكمه‌تیار بۆ یه‌كه‌مجار بۆ ئاژانسی ئانادۆڵو دوا

كابول - AA
رابه‌ری حزبی ئیسلامی ئه‌فغانستان، گولبه‌ددین حیكمه‌تیار ئاماژه‌ی به‌وه‌ كرد كه‌ لایەن هه‌یه‌ هه‌وڵ ده‌دات بۆ به‌رده‌وامیدان به‌ جه‌نگ له‌ پێناو به‌رژه‌وه‌ندیه‌كانی خۆی له‌ ناوچه‌كه‌دا و، گوتی: "ژمارەیەک وڵاتی گه‌وره‌ هه‌ن كه‌ وه‌به‌رهێنان له‌سه‌ر ئه‌وه‌ ده‌كه‌ن".
دوای واژووكردنی رێككه‌وتننامه‌ی ئاشتیی له‌گه‌ڵ ده‌وڵه‌تی ئه‌فغانستان له‌ مانگه‌كانی رابردوودا، رابه‌ری حزبی ئیسلامی ئه‌فغانستان، گولبەددین حیكمه‌تیار گه‌ڕایه‌وه‌ بۆ كابولی پایته‌ختی ئه‌فغانستان و، بۆ یه‌كه‌مجار له‌ راگه‌یاندنی جیهانیدا بۆ ئاژانسی ئانادۆڵو دووا.
گولبەددین حیكمه‌تیار باسی له‌وه‌ كرد كه‌ دوژمنانی ئیسلام له‌ ئاشتیی و جه‌نگیشدا نه‌یانهێشتووه‌ گەلی ئه‌فغانستان ئاسووده‌بێت و، له‌ هه‌ردوو باره‌كه‌دا گەلی ئه‌فغانستان قوربانیان داوه‌، له‌گه‌ڵ ئه‌وه‌یشدا له‌ ئه‌فغانستاندا جه‌نگ و خوێنڕشتن به‌رده‌وامه‌ و، گوتی: "ئومێده‌وارم رۆژانێك دێت گه‌لی ئه‌فغانستان نابێته‌ قوربانی جه‌نگ و خوێن ناڕژێت".
رابه‌ری حزبی ئیسلامی ئه‌فغانستان، گولبه‌ددین حیكمه‌تیار، ئاماژه‌ی به‌وه‌ كرد كه‌ دوژمنانی وڵات هه‌میشه‌ له‌ بۆسەدان بۆ به‌رده‌وامیدان به‌ جه‌نگ و، بۆ ئه‌وه‌ش وه‌به‌رهێنانی زۆریان كردووه‌ و، گوتی: "گه‌لی ئه‌فغانستان ماوه‌ی نزیكه‌ی 40 ساڵه‌ له‌ جه‌نگدایه‌. ئه‌و جه‌نگانه‌ش له‌ ده‌ره‌وه‌ و له‌ لایه‌ن وڵاتانی دیكه‌وه‌ به‌سه‌ر گه‌لی ئه‌فغانستاندا سه‌پێنراوه‌".
- "یه‌كێتیی سۆڤیه‌ت میراتی جه‌نگی بۆ ئێمه‌ جێهێشت"
رابه‌ری حزبی ئیسلامی ئه‌فغانستان، گولبه‌ددین حیكمه‌تیار، باسی له‌وه‌ كرد كه‌ یه‌كێتیی سۆڤیه‌تی جاران سه‌ره‌ڕای ئه‌وه‌ی کە له‌ ئه‌فغانستان كشایه‌وه‌ به‌ڵام میراتی جه‌نگی بۆ گەلی ئه‌فغانستان جێهێشتووه‌ ئه‌و جه‌نگانه‌ی ئێستا ده‌گوزه‌رێن به‌رده‌وامی ئه‌وه‌یه‌.
گولبه‌ددین حیكمه‌تیار ئاماژه‌ی به‌وه‌دا كه‌ ئیدی له‌ ئه‌فغانستان كۆتایی شه‌ڕ نزیكبووه‌ته‌وه‌ و هه‌مووان له‌ شه‌ڕ ماندوو بوون و رایگه‌یاند، ئیدی ئه‌وانیش له‌وه‌ تێگه‌یشتوون كه‌ ده‌بێت كێشه‌كانی ئه‌فغانستان به‌ هه‌وڵی گەلی ئه‌فغانستان خۆیان چاره‌سه‌ر بكرێت.
ناوبراو جه‌ختیكرده‌وه‌ كه‌ ئه‌وانه‌ی ده‌یانه‌وێت به‌ جه‌نگ هه‌ندێك شتیان ده‌ست بكه‌وێت، ئیدی له‌وه‌ تێگه‌یشتوون كه‌ ناتوانن به‌ چه‌كی پێشكه‌وتوو و سوپا سه‌ربكه‌ون و ئه‌م جه‌نگانه‌ سه‌ركه‌وتوویان نییه‌.
رابه‌ری حزبی ئیسلامی ئه‌فغانستان، گولبه‌ددین حیكمه‌تیار هه‌روه‌ها جه‌ختیكرده‌وه‌ كه‌ گەلی ئه‌فغانستان ته‌نها به‌ رێككه‌وتن له‌ نێوان خۆیاندا ده‌توانن سه‌ربكه‌ون و گوتی: "ئێمه‌ به‌ كۆبوونه‌وه‌ له‌گه‌ڵ سه‌رجه‌م گرووپه‌كاندا هه‌وڵی دۆزینه‌وه‌ی چاره‌سه‌رێك ده‌ده‌ین. له‌وباره‌وه‌ په‌یوه‌ندیمان به‌ هه‌ندێك له‌ گرووپه‌كانه‌وه‌ كردووه‌ و بینیمان ئه‌وانیش پێیان باشه‌. هه‌مووان بیره‌وه‌ریی تاڵیان له‌گه‌ڵ جه‌نگه‌كانی رابردوودا هه‌یه‌ و نایانه‌وێت دووباره‌ ببنه‌وه‌."
گولبه‌ددین حیكمه‌تیار بانگه‌شه‌ی ئه‌وه‌ی كرد كه‌ داعش و قاعیده‌ كێشه‌یه‌كی زۆر گه‌وره‌ نین بۆ وڵاته‌كه‌ و جه‌ختیكرده‌وه‌ کە كێشه‌ی راسته‌قینه‌ وڵاته‌ زلهێزه‌كانن كه‌ له‌به‌ر به‌رژه‌وه‌ندیی خۆیان له‌ ناوچه‌كه‌دا هه‌وڵه‌كانیان خستووه‌ته‌گه‌ڕ و وه‌به‌رهێنان ئه‌نجام ده‌ده‌ن.
ناوبراو گوتی: "هێزه‌ ده‌ره‌كییه‌كان گەلی ئه‌فغانستان وه‌ك ئامرازێك له‌م جه‌نگه‌دا به‌كارده‌هێنن" و جه‌ختی كرده‌وه‌، ئه‌گه‌ر گەلی ئه‌فغانستان له‌ناو خۆیاندا رێكبكه‌ون، كێشه‌ ناوخۆیی و ده‌ره‌كییه‌كانیش چاره‌سه‌ر ده‌بن.
- "پشتگیریی ده‌سه‌ڵاتی ئێستا ده‌كه‌ین"
رابه‌ری حزبی ئیسلامی ئه‌فغانستان، گولبه‌ددین حیكمه‌تیار رایگه‌یاند كه‌ ئه‌وان به‌ دوای گۆڕینی ده‌سه‌ڵاته‌وه‌ نین و بێ هیچ پێشمه‌رجێك پشتگیریی ده‌سه‌ڵات ده‌كه‌ن بۆ كۆتاییهێنان به‌ جه‌نگ و ده‌سته‌به‌ركردنی ئاشتی.
جه‌ختیشیكرده‌وه‌ كه‌ چاوه‌ڕوانی وه‌رگرتنی پله‌ و پۆست و شه‌راكه‌تی ده‌سه‌ڵات نین.
رابه‌ری حزبی ئیسلامی ئه‌فغانستان، گولبه‌ددین حیكمه‌تیار لەبارەی دوای هێرشەکەی کابولیشەوە جەختی لەوە کردەوە، ئەنجامدەرانی ئەم هێرشە دڕندەن و هیچ بەزەییەکیان لە دڵدا نییە.
گولبەدین حیکمەتیار پێداگیری لەوە کرد کە پلەی دڕندەیی لای گەلی ئەفغانستان نەگەیشتووەتە ئەو رادەیەی هێرشی لەمجۆرە ئەنجام بدات و گوتی: "دەستی دەرەکی لە پشت ئەم هێرشەوە هەیە. ئەوان هیچ سنوورێک ناناسن. هیچ پیرۆزییەکیان نییە. لە هێرشەکەدا کەسانی بێتاوان کوژران، تەنها ئەو کەسانەی باوەڕیان بە خوا نییە و بەزەیی لە دڵە رەقەکانیاندا نییە ئەم کارە دەکەن".
رابه‌ری حزبی ئیسلامی ئه‌فغانستان، گولبه‌ددین حیكمه‌تیار ئاماژەی بەوەدا کە شانازی بە گەلی تورکەوە دەکات و گوتی: "گەلی تورک بۆ جیهانی ئیسلامی سەرچاوەی شانازییە. هاتنە سەر شەقامی گەلی تورک لە کاتی هەوڵی کودەتاکەی ١٥ی تەمووز جێگای شانازییە. تورکەکان بە جیهانیان سەلماند کە تورکیا بەهێزە. گەلی تورک شایستەی ئەوەیە سەرکردایەتی جیهانی ئیسلامی بکات".
- رێککەوتننامەی ئاشتی
ساڵی رابردوو، سەرۆکی ئەفغانستان ئەشرەف غەنی و رابه‌ری حزبی ئیسلامی ئه‌فغانستان، گولبه‌ددین حیكمه‌تیار رێککەوتننامەی ئاشتییان واژووکرد.
لە بەشێک لە خاڵەکانی رێککەوتننامەکەدا ئاماژە بەوە دراوە ناوی حیکمەتیار و ئەندامانی پارتەکەی لە لیستی رەشی نێودەوڵەتی دەردەهێنرێت، بۆ ئەوەی بە شێوەیەکی ئاسایشپارێزراو بژین نشینگەیەکی جیایان بۆ دەکرێتەوە، دەرفەتی سوودبینین لە تواناکانی دەوڵەتییان بۆ دەڕەخسێنرێت و ئەندامە دەستبەسەرکراوەکانیان ئازاد دەکرێن.