یەکێتی ئەورووپا.. پاکێجێکی ھاوکاری بۆ ئێران راگه‌یاند

برۆکسڵ - AA

یەکێتی ئەورووپا پاکێجێکی ھاوکاری بە بڕی ١٨ ملیۆن یۆرۆی بۆ ئێران راگەیاند.

بەپێی ئەو راگەیاندراوەی لە کۆمیسیۆنی یەکێتی ئەورووپا بڵاوکراوەتەوە، پاکێجێک بە بڕی ١٨ ملیۆن یۆرۆ بۆ گەشەپێدانی کۆمەڵایەتی و ئابووری ئێران پەسند کراوە کە، ھەشت ملیۆن یۆرۆ لەم بڕە تەرخانکراوە بۆ گەشەپێدانی سێکتەری تایبەت.

ئەو بڕە ھاوکارییە بریتییە لە پاکێجی یەکەمی ھاوکارییەکانی یەکێتی ئەورووپا بۆ ئێران لە چوارچێوەی رێککەوتنی ناووکی، کە کۆی گشتی ئەو بڕە پارەیە دەگاتە ٥٠ ملیۆن یۆرۆ.

لەلایەکی دیکەش نوێنەری باڵای یەکێتی ئەورووپا بۆ کاروباری دەرەوە، فێدەریکا مۆگەرینی لەمبارەیەوە گوتی: "لە چوارچێوه‌ی نوێبوونەوەی پەیوەندی نێوان یەکێتی ئەورووپا و ئێران لە ئەنجامی رێککەوتنی ناووکی، لە چەندین سێکتەری جیاواز ھەماھەنگیمان زیاد بووە. بەڵێن دەدەین کە ئەمە درێژەی دەبێت. ئەم پاکێجە نوێیە، گەشە بە ئابووری و کەرتەکانی دیکەش دەدات".