سوپای عێراق دەستگیرکردنی سێ تیرۆریستی داعشی رایگەیاند

ھەولێر ــ AA

سوپای عێراق دەستگیرکردنی سێ تیرۆریستی داعش کە ژمارەیەک تاوەرەی گواستنەوەی کارەبایان لە پارێزگای دیالە کردووەتە ئامانج، راگەیاند.

شانەی راگەیاندنی ئەمنی سەربە فەرماندەیی ئۆپەراسیۆنە ھاوبەشەکانی عێراق لە راگەیەندراوێکدا ئاماژەی بەوەداوە کە ھێزەکانی ئاژانسی ھەواڵگریی و لێکۆڵینەوەی فیدراڵیی بەردەوامن لە ئەنجامدانی ئۆپەراسیۆن بۆ راوەدوونانی پاشماوەکانی رێکخراوی تیرۆریستیی داعش و کەسانی داواکراو، ھەروەھا ئەو کەسانەیشی کە یاریی بە ئاسایشی وڵاتەوە دەکەن، بەتایبەتیش دوای ئەوەی لە میانی چەند مانگی رابردوودا، تاوەرەکانی گواستنەوەی کارەبا لە پارێزگای دیالە کراونە ئامانج و ھاتووە:

"ھێزەکانی ئاژانسی ھەواڵگریی و لێکۆڵینەوەی فیدراڵیی سەربە وەزارەتی ناوخۆ لە میانی ئۆپەراسیۆنێکدا، سێ تیرۆریستیان لە قەزای عوزێم باکووری پارێزگای دیالە دەستگیرکردووە."

بەپێی راگەیەندراوەکە، تیرۆریستە دەستگیرکراوەکان لە میانی لێکۆڵینەوەکاندا، دانیان بەوە داناوە کە سەربە رێکخراوی تیرۆریستیی داعشن و ژمارەیەک تاوەرەی گواستنەوەی کارەبایان لە پارێزگای دیالە تەقاندووەتەوە.

ئەوەیش خراوەتەڕوو کە رێوشوێنی یاسایی بەرامبەر تیرۆریستە دەستگیرکراوەکان، گیراونەتەبەر.