Влада: Со Законот за јазиците добиваат сите граѓаните и Македонија

СКОПЈЕ (АА) - Владата на Република Македонија преку соопштение изразува жалење за одлуката на претседателот на Република Македонија, Ѓорге Иванов да не го потпише указот за Законот за употреба на јазиците, пренесува Anadolu Agency (AA).

„Во оваа прилика сакаме уште еднаш да нагласиме дека сите одредби во законското решение за употребата на јазиците се во согласност со амандманот 5 од Уставот на Република Македонија. Со Законот ја унапредуваме употребата на јазиците на сите заедници во Република Македонија. Мотивот за донесување на овој закон е грижата за сите граѓани во Република Македонија, во која градиме општество еднакво за сите. Тоа е концепт во кој оваа Влада силно верува и кој ќе продолжиме и понатаму да го унапредуваме", стои во реакцијата на Владата.

„Од Владата посочуваат дека со Законот за употреба на јазици, ќе се прошири употребата на службениот јазик што го зборуваат најмалку 20 отсто од граѓаните, што значи дека Законот, согласно ова, ја проширува употребата на јазиците во институциите и ќе овозможи на граѓаните да комуницираат со државните институции на својот мајчин јазик", се вели во реакцијата.

Исто така, се нагласува дека Владата на Република Македонија се определи за политики што ја градат Република Македонија како граѓанска држава на сите кои живеат во неа: Македонци, Албанци, Турци, Срби, Власи, Роми, Бошњаци и сите други заедници и се наведува дека јазичните политики ќе се сообразуваат според потребите на граѓаните од сите етнички заедници.

„Особено значајно, овој закон целосно ја гарантира соодветната употреба на македонскиот јазик и на другите јазици кои се во службена употреба во одредени единици на локална самоуправа - турски, ромски, српски, влашки и бошњачки. Владата со ова овозможува сите граѓани полесно и поефикасно да ги остварат своите уставни права. Законот беше донесен соодветно на предвидените процедури во Собранието. Опозицијата ги имаше сите можности амандмански да учествува во усовршувањето на законот. Опозицијата сама донесе одлука да не учествува во политичкиот процес на донесување на Законот за употреба на јазиците. Неучеството не ја исклучува политичката одговорност", стои во реакцијата на Владата.

Од таму наведуваат дека Законот за употреба на јазиците не го доведува во прашање унитарниот карактер на Македонија, ниту, пак, употребата на македонскиот јазик и неговото кирилско писмо кои и понатаму остануваат единствени официјални службен јазик и писмо на целата територија на Република Македонија и во нејзините меѓународни односи, одбраната, централната полиција и монетарната политика.

„Законот ќе биде испратен на мислење во Венецијанската комисија и сите нивни забелешки ќе бидат вградени во текстот на овој закон. Ова е гаранција дека законот не предвидува ништо спротивно од европските стандарди за употреба на јазиците на етничките заедници. Ако некој граѓанин има право да зборува на својот мајчин јазик, со тоа не губат другите граѓани, а добива Република Македонија, како граѓанска и демократска држава", стои во реакцијата.

Потсетуваме, претседателот на Република Македонија Ѓорѓе Иванов во своето обраќање до јавноста вечерва изјави дека донел одлука да не го потпише указот за прогласување на Законот за употреба на јазиците, којшто беше изгласан во Собранието на Република Македонија.