Претседателот на турскиот Парламент, Шентоп, се сретна со претседателот Пендаровски

СКОПЈЕ

Мустафа Шентоп, претседателот на Големото народно собрание на Турција, се сретна со претседателот на Северна Македонија, Стево Пендаровски, известува Агенција Анадолија (АА).

Пендаровски се состана со Шентоп и делегацијата што го придружуваше на приемот што се одржа во претседателската резиденција „Вила Водно“ во Скопје.

На средбата Пендаровски рече дека Денот на наставата на турски јазик не е празник само на Турците, туку и на цела Северна Македонија.

Потсетувајќи дека во изминатиот период престојувал во Анталија, Пендаровски истакна дека имаат обврски на повисоко ниво да ги унапредат контактите и односите меѓу двете земји.

Шентоп му ги пренесе на Пендаровски поздравите на претседателот Реџеп Таип Ердоган.

Изразувајќи ја својата среќа што по повод Денот на наставата на турски јазик е во посета на Северна Македонија, со која имаат длабоко вкоренети историски, културни и човечки врски, Шентоп упати честитки по повод празникот на Турците во Северна Македонија.

Потсетувајќи дека Северна Македонија годинава ја одбележува 30-годишнината од својата независност, Шентоп рече дека во изминатите 30 години ги унапредиле односите и соработката со Северна Македонија, која е важен партнер и сојузник на Турција на балканските простори.

Посочувајќи дека нивното партнерство ќе продолжи да зајакнува на многу полиња, како што се трговијата, инвестициите, туризмот, одбранбената индустрија, образованието и културата, Шентоп рече дека смета дека заокружувањето на интеграцијата на Северна Македонија во европските и евроатлантските институции претставува значаен чекор за стабилноста и благосостојбата на регионот. Тој ја пренесе својата поддршка за што поскоро започнување на пристапните преговори на Северна Македонија со ЕУ.

„Без сомнение, како две пријателски земји, ќе ја продолжиме нашата соработка и солидарност во мултилатералните платформи, вклучувајќи го и НАТО“, рече Шентоп.

Истакнувајќи дека економските односи меѓу двете земји имаат голем потенцијал, Шентоп информираше дека радува растот на трговската размена од 46 отсто во однос на претходната година.

Изјавувајќи дека ова забрзување на трговската размена меѓу Турција и Северна Македонија покажува дека заедничката цел од 1 милијарда долари ќе биде постигната во блиска иднина, Шентоп истакна: „Мислам дека треба што поскоро да ги завршиме преговорите за ажурирање на Договорот за слободна трговија за да го покриеме секторот на земјоделски производи и услуги. Ова ќе го отвори патот и за зголемување на нашата меѓусебна трговија и за проширување на нашата економска соработка. Во исто време, ажурирањето на Договорот за слободна трговија ќе го отвори патот за нови турски инвестиции во Северна Македонија.“

Изразувајќи ја својата среќа што Турците од Северна Македонија живеат во мир и благосостојба и придонесуваат за економскиот развој на земјата, Шентоп истакна дека придаваат важност на доброто образование на турското општество и на обезбедување широко распространето школување на турски јазик во основното и средното образование.

Истакнувајќи дека оваа година епидемијата на коронавирусот длабоко го погодува целиот свет, Шентоп ја даде следната проценка: „Оваа епидемија уште еднаш го потсети целото човештво на важноста на солидарноста и споделувањето во тешките моменти. Како Турција, застанавме покрај Северна Македонија во овој процес со медицинската помош и поддршка што ја обезбедивме под мотото ‘пријателите се познаваат во тешките денови’. Турската вакцина за Ковид-19 достигна напредна фаза во процесот на развој. Со задоволство ќе обезбедиме поддршка во вакцини за нашиот пријател Македонија кога ќе започне фазата на производство.“